Parbhani News : परभणी जिल्ह्यातील २२ पैकी ११ लघू प्रकल्पांमध्ये सरासरी १३ टक्के पाणीसाठा शिल्लक राहिला आहे.१ लघू प्रकल्प तलाव कोरडा पडला आहे तर ७ लघू प्रकल्पांच्या तलावांतील पाणीसाठा जोत्याखाली गेला आहे.

दोन मध्यम प्रकल्पात सरासरी १९ टक्के पाणीसाठा शिल्लक राहिला आहे. उपसा, बाष्पीभवन आदी कारणांमुळे जिल्ह्यातील जल प्रकल्पांतील पाणीसाठा कमी होत आहे. येत्या काळात पाणी टंचाईचे स्वरूप गंभीर होण्याची शक्यता आहे.

जिल्ह्यातील लघू प्रकल्पांमध्ये गुरुवारी (ता. १६) सरासरी १३ टक्के पाणीसाठा उपलब्ध होता.त्यात पेडगाव (ता. परभणी) येथील तलावात १२ टक्के, आंबेगाव (ता. मानवत) येथील तलावात ९ टक्के, वडाळी (ता. जिंतूर) येथील तलावात ३ टक्के, आडगाव (ता. जिंतूर) येथील तलावात २६ टक्के,

केहाळ (ता. जिंतूर) येथील तलावात २ टक्के, भोसी (ता. जिंतूर) येथील तलावात १५ टक्के, कवड (ता. जिंतूर) येथील तलावात २ टक्का, मांडवी (ता. जिंतूर) येथील तलावात २ टक्के, पाडाळी(ता. जिंतूर) येथील तलावात ७ टक्के उपयुक्त पाणीसाठा होता.

झरी (ता. पाथरी )येथील तलावात ७१ टक्के, पिंपळदरी (ता. गंगाखेड) येथील तलावात २१ टक्के,राणीसावरगाव (ता. गंगाखेड) येथील तलावात ५८ टक्के, टाकळगाव (ता. गंगाखेड) येथील तलावात १३ टक्के, तांदुळवाडी (ता. पालम) येथील तलावात ५१ टक्के पाणीसाठा होता.

गतवर्षी (२०२२) याच तारखेला लघुतलावांत सरासरी ३५.८८६ दलघमी (८५टक्के) उपयुक्त पाणीसाठा होता. चारठाणा (ता. जिंतूर) लघू प्रकल्प कोरडा आहे. देवगाव, जोगवाडा, बेलखेडा, चिंचोली, दहेगाव (सर्व ता. जिंतूर), नखावाडी (ता. सोनपेठ), कोद्री (ता. गंगाखेड) या ७ लघू तलावांतील पाणीसाठा जोत्याखाली गेला आहे.