Mhasadi News : वन्यपशूंची पाळीव प्राण्यांवरची हल्ल्याची शृंखला काही थांबत नसल्याचे चित्र आहे. गेल्या आठवड्यापासून वन्यपशू बिबट शेतकऱ्यांचे पशुधन फस्त करीत आहे. गुरुवारी सकाळी सातच्या सुमारास उमराड शिवारात बिबट्याच्या हल्ल्यात अवघ्या दहा दिवसांच्या कालवडीचा जीव गेला. दुधाची धार काढून शेतकरी घरी गेल्यावर पाठीमागे बिबट्याने कालवडीचा जीव घेतला आहे.

देऊर रस्त्यावरील विश्वेश्वर मंदिराजवळ उमराड शिवारात दयाराम सीताराम देवरे-पाटील यांचे शेत आहे. ज्येष्ठ शेतकरी देवरे यांच्या मुलांनी औताच्या बैलासह दुभत्या जनावरांची शेतातच व्यवस्था केली आहे. गुरुवारी पहाटे श्री. देवरे यांचा मुलगा अनंत देवरे गायींचे दूध काढून घरी आल्यावर तासाभरात शेतात गेल्यावर पाठीमागे बिबट्याने कोवळ्या कालवडीचा फडशा पाडल्याचे दिसले.

वन विभागास माहिती दिल्यावर वनकर्मचारी पंडित खैरनार, रमेश बच्छाव, नितीन भदाणे आदींनी पंचनामा केला. धमनार, वसमार, काकाणी, राजबाईशेवाळी, चिंचखेडे, भडगाव, काळगाव आदी ठिकाणी बिबट्या आता दररोज कुठे ना कुठे तरी पाळीव प्राण्यांवर हल्ला चढवत आहे. बेफिकीर वन विभाग पिंजरा लावून बिबट्यास कधी जेरबंद करेल याविषयी ग्रामस्थांनी प्रश्न उपस्थित केला आहे.