नगरः जिल्ह्यात गेल्या महिनाभरापासून सातत्याने कांदा दरात सातत्याने चढउतार सुरु आहे. शनिवारी (ता. ६) नगर येथील दादा पाटील शेळके बाजार समितीत कांद्याला ५०० ते २४०० रुपयाचा प्रती क्विंटल दर मिळाला. त्याआधी आठ दिवसांपूर्वी हा दर ५०० ते ३३०० रुपयाचा दर होता. आवक कमी-जास्त होत आहे. 

जिल्ह्यात यंदा कांद्याचे क्षेत्र अधिक आहे. रब्बीत लवकर लागवड केलेला कांदा काढणी केला जात आहे. त्यामुळे बाजारात कांदयाची आवक होत आहे. नगरसह शेजारच्या जिल्ह्यातून कांद्याची नगरला आवक होत असल्याने आवकेत सतत कमी जास्त होत आहे. शनिवारी (ता. ६) नगरला २६ हजार ५१४ क्विंटल कांद्याची आवक झाली. त्या दिवशी ५०० ते २४०० व सरासरी दोन हजाराचा दर होता. ४ मार्चला ३०० ते २४०० रुपयाचा दर मिळाला, तर २८ हजार ३१३ क्विंटलची आवक झाली. 

एक मार्चला २१ हजार ६१६ क्विंटलची आवक झाली आणि ५०० ते ३३०० रुपयाचा दर होता. २७ फेब्रुवारीला ३२ हजार ५२२ क्विंटलची आवक होऊन ५०० ते २४०० रुपयाचा दर मिळाला. 

२५ फेब्रुवारीला ५० हजार ३८९ क्विंटलची आवक होऊन ५०० ते३३०० रुपयाचा दर मिळाला. २२ फेब्रुवारीला ३५ हजार ४०२ क्विंटलची आवक होन १००० ते ४५०० रुपयाचा प्रती क्विंटल दर मिळाला. गेल्या पंधरा दिवसात कांदा दरात सातत्याने चढउतार होत आहे असे बाजार समितीतून सांगण्यात आले. राहाता, राहुरी, श्रीरामपूर, कोपरगाव, पारनेर बाजार समितीतही असे दर होते.