परभणी ः ‘‘उत्पन्न वाढीसाठी जिल्ह्यातील महिला शेतकऱ्यांनी (Farmer) शेतीपूरक गांडूळ खतनिर्मिती उद्योग सुरू करणे गरजेचे आहे,’’ असे प्रतिपादन जिल्हा परिषदेच्या (Zilla Parishad) मुख्य कार्यकारी अधिकारी रश्मी खांडेकर यांनी केले.

कृषी विभाग, रिलायन्स फाउंडेशन, उमेदतर्फे शनिवारी (ता. १९) पंचायत समिती पाथरी येथे आयोजित एकात्मिक शेती पद्धती व गांडूळ खतनिर्मिती प्रशिक्षणात त्या बोलत होत्या. रावसाहेब परमार, दीपक दहे, रामप्रभू कोरके, ज्ञानेश्‍वर घाडगे, संदीप जाधव, अमोल खंडागळे, विजया ठेंगे, गणेश गिरी उपस्थित होते.

‘‘रासायनिक निविष्ठांच्या अतिवापराने जमिनीची सुपीकता, उत्पादकता कमी होत आहे. त्याचे मानवी आरोग्यावर दुष्परिणाम होत आहेत. त्यासाठी एकात्मिक शेती पद्धतीचा अंगीकार आवश्यक आहे.

महिला बचत गटांच्या मदतीने गावस्तरावर गांडूळ खतनिर्मिती करून त्याचे ब्रँडिंग, पॅकेजिंग, लेबलिंग व मार्केटिंगसाठी महिलांना, शेतकऱ्यांना प्रोत्साहित करणे हा या प्रशिक्षणाचा उद्देश आहे.’’महिला शेतकऱ्यांना ६५ गांडूळ बेडचे वाटप रिलायन्स फाउंडेशनतर्फे करण्यात आले. ५ तालुक्यांत एकूण ३४५ गांडूळ बेडचे वितरण केले जाईल, असे या वेळी सांगण्यात आले.