अॅग्रोवन वृत्तसेवा
परभणी ः ग्राफ्टिंग रोबोटच्या माध्यमातून कमी मनुष्यबळात, कमी वेळात जास्त प्रमाणात दर्जेदार रोप कलमांची (Grafting) निर्मिती करणे शक्य होणार आहे.

विद्यापीठाच्या वतीने ग्राफ्टिंग रोबोटवर (Grafting Robot) संशोधन व प्रशिक्षण कार्य करण्यात येणार आहे, हे तंत्रज्ञान नर्सरी चालक, बागायतदार शेतकरी यांना उपयुक्त ठरेल, असे प्रतिपादन कुलगुरू डॉ. इंद्र मणी मिश्रा (Dr. Indra Mani Mishra) यांनी केले.

वसंतराव नाईक मराठवाडा कृषी विद्यापीठातील भारतीय कृषी संशोधन परिषद आणि जागतिक बँक पुरस्‍कृत राष्ट्रीय कृषी उच्च शिक्षण प्रकल्प (नाहेप) अंतर्गत दोन दिवसीय ग्राफ्टिंग रोबोट यावर सोमवारपासून (ता. २०) दोन दिवसीय कार्यशाळा आयोजित करण्यात आली.

कार्यशाळेच्‍या उदघाटनप्रसंगी डॉ. मिश्रा बोलत होते. या वेळी प्राचार्य डॉ. यू. एम. खोडके, नाहेप प्रकल्प प्रमुख डॉ. गोपाळ शिंदे, इंजि. डी. व्ही. पाटील, डॉ. गोदावरी पवार, डॉ. डी. डी. टेकाळे आदींची उपस्थिती होती.

यात जपान देशातील हेल्पर रोबोटेक कंपनीचे तज्ज्ञ प्रशिक्षण देणार आहेत. या वेळी नाहेप प्रकल्पाअंतर्गत खरेदी केलेल्‍या ग्राफ्टिंग रोबोटेचे उद्‍घाटन कुलगुरू डॉ. मिश्रा यांच्या हस्ते करण्यात आले.

रोबोटच्या माध्यमातून दिवसामध्ये तीन हजार रोपांचे कलमीकरण होते. या कार्यशाळेत ग्राफ्टिंग रोबोटवर केकेके जपान येथील संशोधक डॉ. ई. एस. शिवशंकर, मुरा कोशी आणि जुगो मिनोहरा मार्गदर्शन करणार असून आठ हजार रोपांचे कलमीकरण करण्‍यात येणार आहे.