Katraj Dairy News : राज्य सरकारने गायीच्या दूध खरेदी दरात प्रतिलिटर २ रुपयांनी वाढ करून ३४ रुपये दर केला आहे. सहकारी दूध संघांना शासनाच्या निर्णयाची अंमलबजावणी करावी लागत असल्याने त्यांना आर्थिक भुर्दंड सहन करावा लागत आहे. त्यामुळे सरकारने दुधाला दोन रुपयांचे अर्थसाहाय्य करून सहकारी दूध संघास पाठबळ देण्याची मागणी जिल्हा दूध उत्पादक संघाने (कात्रज डेअरी) केली आहे.

शासन निर्णयानुसार २१ जुलै २०२३ पासून दूध उत्पादकाला ३४ रुपये प्रतिलिटर दर देण्याचे आदेश झाले. त्याप्रमाणे कात्रज डेअरीने त्याची अंमलबजावणी केली. या निर्णयामुळे संघाला प्रतिदिन साडेतीन लाखांचा तोटा होत असून तो दुग्ध व्यवसाय विकास आयुक्तांना कळविण्यात येत आहे. त्यामुळे अर्थसाह्य न दिल्यास संघाला ३४ रुपये भाव देणे शक्य होणार नसून ते परवडणारे नाही.

संघाकडून दूध उत्पादकाला वर्षअखेर दूधदर फरक देण्यात येतो. संघ दूध उत्पादकाचा असल्यामुळे होणारा नफा हा उत्पादकाच्या हितासाठीच वापरला जातो. तरी दुधाचे दर ३४ रुपये प्रति लिटरचे बंधनकारक करू नये, अशी मागणी राज्याचे उपमुख्यमंत्री अजित पवार आणि पशुसवंर्धन व दुग्ध व्यवसाय विकास मंत्री राधाकृष्ण विखे-पाटील यांच्याकडे संघाचे अध्यक्ष भगवान पासलकर यांनी केली आहे.

‘प्रतिदिन साडेतीन लाखांचे नुकसान’

निर्णयापूर्वी संघाचा खरेदी दर ३२ रुपये प्रतिलिटर होता. तो वाढल्याने पाऊच विक्रीमध्ये होणारे उत्पन्न २ रुपयांनी कमी झाले आहे. त्यामुळे संघाला प्रतिदिन ३ लाख ५० हजार व महिन्याला १ कोटीचे नुकसान सहन करावे लागत असून हा तोटा वाढत आहे.