Ahmednagar News : राज्य सरकारने नेमलेल्या समितीच्या शिफारशीवरून गाईच्या दुधाला ३४ रुपये दर जाहीर केला. परंतु फॅट व ‘एफएनएस’च्या रिटर्नचे दर दूध संघ चालकांनी मनमानी पद्धतीने वाढविले आहे. यामुळे पूर्वीपेक्षा शेतकऱ्यांच्या दुधाला कमी दर मिळेल. त्यामुळे शासनाची ही फसवी दूधदरवाढ असून, ही मनमानी थांबवावी.

तर रिटर्नचे दर पूर्वीप्रमाणे ठेवावेत, या मागणीसाठी राहुरी येथे स्वाभिमानी शेतकरी संघटनेतर्फे रास्ता रोको आंदोलन करण्यात आले. यावेळी सरकारविरोधात जोरदार घोषणाबाजी करण्यात आली.

स्वाभिमानी शेतकरी संघटनेचे जिल्हाध्यक्ष रवी मोरे यांच्या नेतृत्वात अहमदनगर जिल्ह्यातील राहुरी कृषी बाजार समितीसमोर रास्ता रोको आंदोलन करण्यात आले. अहमदनगर-मनमाड हा महामार्ग स्वाभिमानीच्या कार्यकर्त्यांनी अडवला होता.

दूध संघचालक तुपाशी... शेतकरी उपाशी अशी घोषणाबाजी यावेळी शेतकरी संघटनेच्या कार्यकर्त्यांनी केली. दूध दरासह दुधाला तेलंगणा सरकारप्रमाणे पाच रुपयांचे अनुदान देण्याची मागणी देखील यावेळी करण्यात आली. या महामार्गावरच दुधाने अभिषेक घालण्यात आला. यामुळे काही काळ वातावरण तणावाचे बनले होते.

या आहेत स्वाभिमानीच्या मागण्या

दुधाच्या ३.२ या गुणप्रतीस लिटरला ३४ रुपयांचा भाव मिळावा. एसएनएफचा २० पैसे तर फॅटचा ३० पैसे दर निश्चित करावा. तेलंगणा आणि कर्नाटक राज्याच्या धर्तीवर शेतकऱ्यांना प्रती लिटर पाच रुपयांचे अनुदान देण्यात यावे.

पशुधनाला मोफत विमा सरंक्षण देण्यात यावे. डबल टोन दुधावर बंदी आणावी. या प्रमुख मागण्या यावेळी आंदोलकांनी केल्या. यावेळी सरकारच्या विरोधात जोरदार घोषणाबाजी देखील करण्यात आली.