माळेगाव ः नवतंत्र (New Agriculture Technology), नवसंकल्पनांची शेतीला जोड देण्याच्या उद्देशाने अॅग्रिकल्चरल डेव्हलमेंट ट्रस्ट बारामतीच्या (Agriculture Development Trust Baramati) कृषी विज्ञान केंद्रात द्राक्ष व डाळिंब पीक परिसंवाद (Pomegranate Grape Crop Seminar) घेण्यात आला. त्यास शेतकऱ्यांचा उत्तम प्रतिसाद मिळाला. कोणतीही गोष्ट नियोजनपूर्वक, दूरदृष्टी ठेवून केली आणि त्याला आधुनिकतेची जोड दिल्यास निश्चितपणे द्राक्ष, डाळिंब आदी पिकांतून शाश्वत उत्पन्न (Sustainable Income From Pomegranate And Grape Crop) मिळू शकते, असा मोलाचा सल्ला शेतकऱ्यांना या परिसंवादातून मिळाला.

बारामती कृषी विज्ञान केंद्र, शासनाचा कृषी विभाग, आत्मा संस्था (पुणे) आणि इस्राईल केमिकल लिमिटेडतर्फे आयोजित द्राक्ष, डाळिंब पीक परिसंवादाला पुणे, सातारा येथील शेतकऱ्यांची उपस्थिती लक्षणीय ठरली. अध्यक्षस्थानी ॲग्रिकल्चरल डेव्हलपमेंट ट्रस्टचे प्रमुख राजेंद्र पवार होते. या वेळी इस्राईल केमिकल लिमिटेडचे अध्यक्ष अनंत कुलकर्णी,  इस्राईलचे शास्त्रज्ञ डॉ. मेनाचेम असारफ, शास्त्रज्ञ डॉ. उरी येर्मीयाहु, महाराष्ट्र द्राक्ष बागायतदार संघाचे अध्यक्ष शिवाजी पवार, महाराष्ट्र डाळिंब संघाचे उपाध्यक्ष भाऊसाहेब काटे,  द्राक्ष संशोधन केंद्र (पुणे) शास्त्रज्ञ डॉ. प्रशांत निकुंभे, डॉ. युक्ती वर्मा,  शास्त्रज्ञ डॉ. सोमनाथ पोखरे आदी उपस्थित होते.

कुलकर्णी यांनी पानदेठ परिक्षणासाठी सॉफ्टवेअरवर काम सुरू असल्याचे सांगितले. डॉ. येर्मीयाहु म्हणाले, ‘‘डाळिंबामध्ये नत्र, स्फुरद, पालाश या खतांचा डोस डाळिंब पिकाच्या वेगवेगळ्या अवस्थेत दिल्यानंतर शेतकऱ्यांसाठी उपयोग असलेल्या खत मात्रा शोधून काढल्या आहेत. संशोधनात्मक खत मात्रा दिलेल्या फळांची गुणवत्ता, पिकावरील रोग कीड नियंत्रण, अधिक उत्पादन या सर्वांवर योग्य परिणाम होऊन चांगला निकाल मिळाला आहे.’’