भेंडे ः रब्बी हंगामातील (Rabi Season) गहू- हरभऱ्यासह सर्व पिके जोमदार आलेली आहेत. या पिकांबरोबरच उन्हाळ कांद्याची लागवड (Summer Onion Cultivation) अनेक ठिकाणी झालेली असून, काही जण अद्यापही कांदा लागवड (Onion Cultivation) करीत आहेत. मात्र, मजुरांची टंचाई (Labor Shortage) निर्माण झाली आहे.

यंदा भेंडे परिसरात कांदा लागवडीने वेग धरला आहे. कांदारोप बऱ्यापैकी उपलब्ध असले, तरी बदलते ढगाळ हवामान, मजुरांची टंचाई, यामुळे उत्पादनखर्च कमालीचा वाढला आहे.

कांदा लागवडीसाठी नांगरट, शेत तयार करणे, वाफे पाडणे, खत विकत घेणे, याशिवाय फक्त लागवडीला एकरी १० ते १२ हजार रुपये मजुरी, कीटकनाशके यांसह मजुरांची ने-आण करण्यासाठी चारचाकी वाहनाचा वाहतूक खर्च करावा लागतो, तो वेगळाच. एकंदरीत, कांदापीक येईपर्यंत एकरी ४० ते ५० हजार रुपयांपुढे खर्च येतो.

या सर्वांचा ताळमेळ बसविणे कांदा उत्पादकांना अडचणीचे ठरत आहे. मागील वर्षी कांद्याला चांगला भाव मिळेल, अशी आशा होती. मात्र, ती फोल ठरली. मागील वर्षी नाही तर यंदा कांद्याला भाव साधेल, या आशेने शेतकऱ्यांनी कांद्याची लागवड सुरू केली आहे.

कांदा लागवडीसाठी एकरी १० ते १२ हजार, तसेच मजुरी, मशागत, रोपे, खते, कीटकनाशक फवारणी, पीककाढणी याचा खर्च पाहता, एकरी पन्नास हजार रुपये मोजावे लागतात. मागील वर्षी अपवाद सोडता भावात अपेक्षित वाढ झालीच नाही. यंदा मात्र अपेक्षित भाव मिळावा, हीच अपेक्षा.

- राजेंद्र मिसाळ, शेतकरी, भेंडे