Nanded News : जिल्ह्यात जुलैमधील पावसामुळे खरिपातील पेरण्यांची वेग घेतला. मंगळवारपर्यंत (ता. २६) जिल्ह्यात सर्वसाधारण पेरणी क्षेत्राच्या ९२ टक्क्यांनुसार सात लाख सहा हजार हेक्टरवर पेरण्या झाल्या.

यात सर्वाधिक चार लाख हेक्टरवर सोयाबीन, तर एक लाख ९४ हजार हेक्टरवर कपाशीची लागवड झाली आहे. परंतु पाऊस लांबल्याने यंदा ज्वारी, उडीद, मुगाचा पेरा घटल्याची माहिती कृषी विभागाच्या सूत्राने दिली.

जिल्ह्यात खरीप हंगामात सात लाख ६६ हजार ८०९ हेक्टर सर्वसाधारण पेरणी क्षेत्र आहे. यंदा मृग नक्षत्र कोरडे गेल्याने खरिपातील पेरण्यांना उशीर झाला. जुलैच्या पहिल्या आठवड्यात खरिपातील पेरण्यांना प्रांरभ झाला. परंतु हा पाऊस सर्वदूर नसल्याने ठरावीक भागातच पाऊस झाला होता. यानंतर मात्र पावसाने कमी-अधिक प्रमाणात हजेरी लावल्याने सर्वत्र पेरण्यांना सुरुवात झाली.

पाऊस लांबल्याने यंदा मात्र उडीद तसेच मुगाचा पेरा घटला आहे. बुधवारपर्यंत (ता. २६) जिल्ह्यात सर्वसाधारण पेरणी क्षेत्राच्या ९२ टक्क्यांनुसार सात लाख हेक्टरवर पेरण्या झाल्या. यात सर्वसाधारण पेरणी क्षेत्राच्या ११६ टक्क्यांनुसार चार लाख हेक्टरवर सोयाबीन तर तर सर्वसाधारण पेरणी क्षेत्राच्या ८० टक्क्यांनुसार एक लाख ९४ हजार हेक्टरवर कपाशीची लागवड झाली आहे.

सर्वसाधारण पेरणी क्षेत्राच्या ९२ टक्क्यांनुसार ६२ हजार हेक्टरवर तूर, सर्वसाधारण पेरणी क्षेत्राच्या ४८.२० टक्क्यांनुसार १३ हजार हेक्टरवर मूग, सर्वसाधारण पेरणी क्षेत्राच्या ४२.५३ टक्क्यांनुसार १२ हजार हेक्टरवर उडीद, सर्वसाधारण पेरणी क्षेत्राच्या २१.१३ टक्क्यांनुसार साडेनऊ हजार हेक्टरवर खरीप ज्वारीची लागवड झाल्याची माहिती कृषी विभागाच्या सूत्राने दिली आहे.