Solapur News : राज्य शासनाच्या महत्त्वाकांक्षी अशा ‘गाळमुक्त धरण, गाळयुक्त शिवार’ या योजनेतून जिल्ह्यात ६१ कामांमधून ११.५० लाख घनमीटर इतका गाळ काढण्यात आला आहे. सुमारे १५०० एकर क्षेत्रामध्ये हा गाळ पसरण्यात आला आहे.

शिवाय तलावातील गाळ काढल्यामुळे नव्याने ११५ कोटी लिटर इतका अतिरिक्त पाणीसाठा निर्माण झाला आहे. राज्यातील अन्य जिल्ह्यांच्या तुलनेत सोलापूर जिल्ह्याने या कामात पहिले स्थान पटकावले आहे.

‘गाळमुक्त धरण व गाळयुक्त शिवार’ योजनेची जिल्ह्यात प्रभावीपणे अंमलबजावणी सुरू आहे. जिल्ह्यातील अकरा तालुक्यांत १०९ कामांना प्रशासकीय मान्यता देण्यात आली होती. त्यातील ६१ कामे पूर्ण झाली आहेत.

तर उर्वरित कामेही युद्धपातळीवर सुरू आहेत. या योजनेमध्ये २५ अशासकीय संस्था सहभागी झाल्या आहेत. अंदाजे १५०० शेतकऱ्यांनी या योजनेचा लाभ घेतला आहे. परवानगी दिलेल्या ६१ कामांमधून ११.५० लाख घन मीटर इतका गाळ काढला आहे. जिल्ह्याने गाळ काढणे, तो पसरणे यात पहिले स्थान पटकावले.

‘जलयुक्त शिवार’लाही गती

जिल्हाधिकारी मिलिंद शंभरकर यांनी नुकतीच ‘जलयुक्त शिवार’ अभियानाची आढावा बैठक घेतली. त्यात त्यांनी यासंबंधीच्या कामांना गती देण्याची सूचना केली. ‘जलयुक्त शिवार’मध्ये प्राथमिक आराखड्यानुसार ९३ कोटी ९२ लाखांची २ हजार ८९६ कामे प्रस्तावित करण्यात आली होती. त्यातील एक हजार ९४० कामांना मंजुरी देऊन, त्यातून ८६५ कामे सुरू झाली. सुरू झालेल्या या कामातून ५७७ कामे पूर्ण झाली आहेत, असे सांगण्यात आले.