कोल्हापूर : ‘‘शेडशाळच्या महिलांनी सुरू केलेले बीज बँकेचे (Seed Bank) काम हे राष्ट्रनिर्माणाचे मोठे काम आहे. याचा प्रचार आणि प्रसार झाल्यास एक सक्षम पिढी तयार होईल.

बीज बँकेची सुरू झालेली ही चळवळ देशापुढे आदर्श ठरेल,’’ असा विश्वास प्रसिद्ध व्याख्याते वसंत हंकारे यांनी व्यक्त केला.

शेडशाळ (ता. शिरोळ) येथे महादेव स्वामी मठ येथे आयोजित स्व. डॉ. अप्पासाहेब ऊर्फ सा. रे. पाटील महिला फाउंडेशन देशी वाण बीज बँकेचे उद्घाटन मान्यवरांच्या हस्ते झाले.

यावेळी ते बोलत होते. अध्यक्षस्थानी श्री दत्त साखर कारखाना चेअरमन, उद्यानपंडित गणपतराव पाटील होते. यावेळी शेतकरी व महिलांना बीज वाटपही करण्यात आले.

उद्यानपंडित गणपतराव पाटील म्हणाले, ‘‘गेल्या तीन वर्षांपासून येथील महिलांनी अतिशय कष्टाने बीज बँक स्थापन करून अभिमानास्पद कामगिरी केली आहे.

हे काम छोटे वाटत असले तरी जगाच्या दृष्टीने फार मोठे आहे. शिरोळ तालुका कृषी अधिकारी गणेश भोसले म्हणाले, ‘‘कीटकनाशके, तणनाशकामुळे तत्त्वांची कमतरता भासत आहे. अशा परिस्थितीत देशी वाण बियाणे हे आरोग्यदायी ठरणार आहे.’’

यावेळी कृषी मंडल अधिकारी निरंजन देसाई, माती परीक्षणाचे ए. एस. पाटील, दत्त कारखान्याचे संचालक भैय्यासाहेब पाटील, विश्वनाथ माने, जयसिंगपूर उदगाव बँकेचे संचालक महेंद्र बागे, सरपंच गजानन चौगुले, उपसरपंच भारती लाड, ग्रामपंचायत सदस्य सुनील संकपाळ, किरण संकपाळ, रोहिणी कोल्हापुरे, सुनीता नाईक, कवठे गुलंद, सरपंच प्रमिला जगताप आदी या वेळी उपस्थित होते.