अहमदनगर : जिल्ह्यातील जुन्या सर्व बंधाऱ्यांची झालेली दुरवस्था लक्षात घेऊन, सर्व तेरा तालुक्यांतील जुन्या एक हजार ४२ बंधाऱ्यांचे पुनरुज्जीवन करण्यासाठी २०० कोटी रुपयांचा निधी मंजूर करण्यात आला आहे. मुख्यमंत्री जलसंवर्धन योजनेच्या माध्यमातून हा निधी मंजूर झाला आहे.

जिल्ह्यात जिल्हा परिषदेचे जुने ६९८ बंधारे आहेत. जलसंधारण विभागाचे ३४४ बंधारे आहेत. नगर तालुक्यातील शंभर बंधाऱ्यांसाठी चौदा कोटी, कर्जतमधील ३१ बंधाऱ्यांसाठी सात कोटी, कोपरगावातील ४९ बंधाऱ्यांसाठी सात कोटी, जामखेडमधील ४६ बंधाऱ्यांसाठी सात कोटी, नेवाशातील ७२ बंधाऱ्यांसाठी सात कोटी, पाथर्डीतील ७३ बंधाऱ्यांसाठी नऊ कोटी, पारनेरच्या १६५ बंधाऱ्यांसाठी ३३ कोटी, राहत्यातील २९ बंधाऱ्यांसाठी चार कोटी, राहुरीतील २१ बंधाऱ्यांसाठी दोन कोटी, श्रीगोंद्यातील ११८ बंधाऱ्यांसाठी २८ कोटी, संगमनेरमधील १६९ बंधाऱ्यांसाठी ३३ कोटी, शेवगावमधील ९९ बंधाऱ्यांसाठी १५ कोटी, श्रीरामपूरमधील २१ बंधाऱ्यांसाठी चार कोटी, असे सुमारे २०० कोटी रुपये मंजूर झाले आहेत.

जलसंधारण विभागाद्वारे ही कामे केली जातील. लघुपाटबंधारे विभागाच्या ८६८ पैकी ६९८ कामांना प्रशासकीय मान्यता दिली आहे. त्याची अंदाजपत्रकीय किंमत ११४ कोटी आहे, असे सांगण्यात आले. बंधाऱ्याच्या दुरुस्तीमुळे पाणी साठवण क्षमतेत वाढ होईल. त्याचा शेतीला मोठा फायदा होईल.