कोल्हापूर : योजनेत पात्र असूनही निधी (PM Kisan Scheme) मिळवण्यासाठी शेतकऱ्यांची चाललेली धडपड ही नक्कीच वेदनादायी असते. पण याचा नेमका उलट अनुभव माजी खासदार राजू शेट्टी (Raju Shetti) यांना आला आहे.

शेट्टी यांनी मला पीएम किसान सन्मान निधी नको, असे कळवूनही तब्बल ११ हप्ते त्यांच्या नावावर जमा झाले आहेत. एकीकडे पात्र लाभार्थ्यांना हा निधी मिळण्यास विलंब होत असताना लोकप्रतिनिधीलाच हा विचित्र अनुभव आला. यामुळे प्रशासनाचा भोंगळ कारभार चव्हाट्यावर आला आहे.

शेट्टी हे माजी संसदीय सदस्य असल्याने त्यांनी मला या निधीचा फायदा नको असे कळवले होते. नाव वगळण्याची मागणीही केली होती. पण प्रशासनाने याची दखल न घेता त्यांच्या नावावर लाभ देणे सुरूच ठेवले. पीएम किसान सन्मान निधी योजनेअंतर्गत दिला जाणारा दोन हजार रुपयांचा अकरावा हप्ता ३१ मे रोजी त्यांच्या खात्यात जमा झाला. लोकसभेचा माजी सदस्य असल्याने या योजनेसाठी केंद्र सरकारच्या धोरणानुसार अपात्र असूनही हा सन्मान निधी त्यांच्या खात्यावर जमा होत आहे.

याआधी त्यांनी स्वत: ६ हप्ते जमा झाल्यानंतर १२ हजार रुपयांचा धनादेश शासनास परत करून या योजनेतून अपात्र करण्याबाबत पत्र दिले होते. तरीही आज अखेर ११ हप्ते नियमित जमा झालेले आहेत. नको म्हणत असताना ही रक्कम जमा होत असल्याने श्री. शेट्टी यांनी शेवटी मंगळवारी (ता. ६) शिरोळ तहसीलदार सौ. अपर्णा मोरे धुमाळ यांना भेटून या योजनेतून अपात्र करण्याबाबत सुचविले.

मी वारंवार सांगूनही माझ्या खात्यावर पैसे यायचे थांबत नाहीत आणि सर्वसामान्य शेतकऱ्यांनी अनेक हेलपाटे घातले तरीसुद्धा त्यांचे पैसे येत नाहीत. काय गौडबंगाल आहे हे कळत नाही.

- राजू शेट्टी, माजी खासदार