Pest Management : वाशीम ः येथे कृषी विभागाच्या पुढाकाराने येथे पिकांवरील कीड-रोग सर्वेक्षण व सल्ला प्रकल्पाच्या माध्यमातून जिल्हास्तरीय अधिकारी, कर्मचाऱ्यांचे प्रशिक्षण घेण्यात आले. सोयाबीन, कापूस, तूर,हरभरा, भात, मका, ज्वारी व ऊस या महत्त्वाच्या प्रमुख पिकांवर वारंवार तसेच आकस्मिकरीत्या उद्भवणाऱ्या कीड रोगांच्या प्रादुर्भावामुळे होणारे शेतकऱ्यांचे नुकसान व त्यामुळे उत्पादनात होणारी घट लक्षात घेता कीड, रोग सर्वेक्षण, सल्ला, जनजागृती व व्यवस्थापन याबाबत शाश्वत यंत्रणा तयार करण्याच्या दृष्टीने हे आयोजन करण्यात आले होते.

कार्यक्रमाच्या अध्यक्षस्थानी जिल्हा अधीक्षक कृषी अधिकारी आरीफ शहा होते. कार्यक्रमाला आत्मा प्रकल्प संचालक अनिसा महाबळे, उपविभागीय कृषी अधिकारी संजय चातरमल, तंत्र अधिकारी श्रीमती कावरे, प्रमुख मार्गदर्शक म्हणून करडा कृषी विज्ञान केंद्राचे कीटकशास्त्र विभाग प्रमुख राजेश डवरे यांची उपस्थिती होती. कार्यक्रमाचे सूत्रसंचालन कृषी साहाय्यक एम. डी. सोळंके यांनी केले. आभार कृषी पर्यवेक्षक संजय जहागीरदार यांनी मानले. यावेळी जिल्हाभरातील कृषी विभागाचे सर्व अधिकारी कर्मचारी उपस्थित होते.

असे होते सर्वेक्षण...
कृषी साहाय्यक हे त्यांच्या मुख्यालयांतर्गत सोयाबीन, कापूस, तूर, हरभरा, भात, मका, ज्वारी पिकांचे जास्तीत जास्त क्षेत्र असणारी दोन गावे निवडून तेथील सदर दोन प्रमुख पिकांचे सर्वेक्षण करतात. सर्वेक्षणासाठी आठवड्याचे दोन गट करण्यात येतात. पहिला गट सोमवार ते बुधवार व दुसरा गट गुरुवार ते शनिवार याप्रमाणे आठवड्यात ४ प्लॉटचे सर्वेक्षण करण्यात येते.