Sindhudurg News : जिल्ह्यात ५ हजार ६७८ हेक्टरवर भात रोपवाटिका तयार झाल्या असून आतापर्यंत ३ हजार ९११ हेक्टरवरील भातरोप पुनर्लागवडीचे काम पूर्ण झाले आहे. यावर्षी ६२ हजार ३१४ हेक्टर क्षेत्रावर भातपीक लागवड होणार असल्याचे कृषी विभागाकडून स्पष्ट करण्यात आले आहे.

सिंधुदुर्ग जिल्ह्यात खरीप हंगामात मोठ्या प्रमाणात भातपीक उत्पादन घेतले जाते. यावर्षी मॉन्सून लांबला त्यामुळे खरीप हंगामदेखील लांबणार आहे. पाण्याच्या उपलब्धतेवर ५ ते ७ टक्के भात रोपवाटिका तयार करण्यात आल्या होत्या. भात रोपवाटिकांतील रोपे पुनर्लागवडीचे काम सध्या युद्धपातळीवर सुरू आहे.

आतापर्यंत ३ हजार ९११ हेक्टरवरील भातरोप पुनर्लागवड पूर्ण झाली आहे. जिल्ह्यात या खरीप हंगामात ५ हजार ६७८ हेक्टरवर भात रोपवाटिका तयार करण्यात आल्या आहेत. मॉन्सूनपूर्व तयार केलेल्या रोपवाटिकांतील पुनर्लागवड आता पूर्णत्वाकडे आहे.

मात्र २३ जूननंतर ५० टक्क्यांहून अधिक भातरोपवाटिका तयार करण्यात आल्या आहेत. यातील रोपे लागवडी योग्य होण्यासाठी आणखी चार ते पाच दिवसांचा कालावधी लागणार आहे. त्यानंतर पंधरा ते वीस दिवस लागवडीला लागतील, असा अंदाज आहे.