रोहा, जि. रायगड : परतीच्या पावसाने रोहा ग्रामीण भागात धुमाकूळ घातल्यामुळे भातपिकांचे (Paddy Crop) मोठ्या प्रमाणावर नुकसान झाले आहे. साधारणपणे ऑक्टोबर महिन्यात भातकापणीला सुरुवात होते. त्यानुसार ग्रामीण भागातील काही शेतकऱ्यांनी तशी तयारी केली होती; मात्र अचानक आलेल्या पावसामुळे भातकापणी लांबणीवर गेली आहे. अनेक शेतकऱ्यांची पिके पाण्याखाली गेल्याने पिकांचे मोठे नुकसान (Crop Damage) झाले आहे.

परतीचा पाऊस अजूनही पडत असल्याने उरली सुरलेली भातशेतीही वाया जाणार की काय, असा प्रश्न तालुक्यातील वाली, भालगाव, घोसाळे, कोलाड, खांब, मेढे या विभागातील शेतकऱ्यांना भेडसावत आहे. या पावसामुळे शेतकऱ्यांच्या हातातोंडाशी आलेले पीक आडवे होऊ लागले आहे. उभे पीक वाया जाताना पाहून शेतकऱ्यांचा कंठ दाटून येत आहे. अशीच परिस्थिती राहिली तर भविष्यात आम्ही करायचे काय?

आमच्या पोटापाण्याचा प्रश्न कसा सुटणार? या चिंतेत शेतकरी आहेत.निसर्गाच्या लहरीपणामुळे आधीच भातशेतीचे प्रमाण घटत चालले आहे. त्यातच बी-बियाण्यांच्या वाढत्या किमती, शेतमजुरांचे वाढलेले दर, खतांच्या वाढत्या किमती याचा भार सहन करत शेतकरी भातशेती करत आहेत. त्यातच पावसाचा कहर होत असल्याने मिळणारे उत्पादन लांबच राहिले आहे. शेतीसाठी केलेला खर्च तरी या पिकांतून निघेल की नाही, याची शाश्वती शेतकऱ्यांना राहिलेली नाही.

निसर्गाच्या लहरीपणामुळे आधीच भातशेतीचे प्रमाण घटत चालले आहे. त्यातच बी-बियाण्यांच्या वाढत्या किमती, शेतमजुरांचे वाढलेले दर, खतांच्या वाढत्या किमती याचा भार सहन करत शेतकरी भातशेती करत आहेत. त्यातच पावसाचा कहर होत असल्याने मिळणारे उत्पादन लांबच राहिले आहे. शेतीसाठी केलेला खर्च तरी या पिकांतून निघेल की नाही, याची शाश्वती शेतकऱ्यांना राहिलेली नाही.