महाळुंगे पडवळ, ता. आंबेगाव ः तालुक्यात परतीच्या पावसाने कांदा रोपांचे नुकसान (Onion Crop damage) झाले होते. त्यामुळे या वर्षी कांदा लागवड (Onion Cultivation) हंगाम लांबला होता. आता कांदा लागवड अंतिम टप्प्यात आला आहे. जवळपास दहा हजार एकर क्षेत्रांत कांदा लागवड झाल्याचा प्राथमिक अंदाज कृषी विभागाने व्यक्त केला आहे.

आंबेगाव तालुका हा कांदा उत्पादनात अग्रेसर तालुका म्हणून ओळखला जातो. या वर्षी चांगला पाऊस झाल्याने हुतात्मा बाबू गेनू जलाशय (डिंभे धरण) १०० टक्के भरले आहे.

तसेच गावांगावातील पाझर तलावातही चांगला पाणीसाठा उपलब्ध झाला आहे. शेतकऱ्यांनी कांदा लागवडीला प्राधान्य दिले होते.

परंतु ढगाळ हवामान व धुक्यामुळे कांदा पिकावर करपा, भुरी, मुळकूज आदी रोगांचा प्रादुर्भाव झाला आहे.

त्यामुळे काही शेतकऱ्यांनी कांदा लागवड थांबविली होती. पुन्हा कांदा लागवड शेतकऱ्यांनी सुरू केली असून आता कांदा लागवड अंतिम टप्प्यात आला आहे.

जवळपास चार हजार २०३ हेक्टर क्षेत्रांत कांदा लागवड झाली आहे. गेल्या वर्षीच्या तुलनेत या वर्षी चार ते पाच टक्क्यांनी कांदा लागवड क्षेत्रात वाढ होईल, असा अंदाज कृषी कार्यालयाकडून व्यक्त करण्यात आला आहे.

‘ऑक्टोबर महिन्यापर्यंत परतीच्या पावसाने धुमाकूळ घातला होता. त्याचा सर्वाधिक फटका कांदा रोपांना बसला होता. तर शेतात पाणी साचल्याने काही शेतकऱ्यांना कांदा रोपे टाकता आली नाही. तसेच बदललेल्या वातावरणाचाही फटका बसला. त्यामुळे उशिराने कांदा लागवड करावी लागली,’ अशी माहिती शेतकरी नवनाथ काळे यांनी दिली.