पुणे : राज्यात दिवसभर उन्हाचा चटका (Temperature), उकाड्या (Heat) पाठोपाठ सायंकाळनंतर ढगांची दाटी (Cloudy Weather) होत विजा, मेघगर्जनेसह वादळी पाऊस हजेरी (Rainfall) लावत आहे. आज (ता. २) कोकण, मध्य महाराष्ट्र, मराठवाडा आणि विदर्भात विजा, मेघगर्जना, वादळी वाऱ्यासह पावसाचा अंदाज (Rain Forecast) आहे. कमाल तापमान आणि उकाड्यातील वाढ कायम राहण्याची शक्यता हवामान विभागाने वर्तविली आहे.

हिमालयाच्या पायथ्याकडे गेलेला मॉन्सूनचा आस असलेला कमी दाबाचा पट्टा दक्षिणकडे आला असून, अमृतसरपासून बरेली, वाराणसी, पाटना ते आसामपर्यंत विस्तारला आहे. उत्तर तमिळनाडू आणि परिसरावर चक्राकार वाऱ्यांची स्थिती आहे. दक्षिण श्रीलंकेपासून, तमिळनाडू, कर्नाटक, मराठवाडा ते मध्य प्रदेशापर्यंत हवेचा कमी दाबाचा पट्टा सक्रिय आहे. त्यामुळे राज्यात ढगाळ हवामान होत असून, विजांसह पावसाने हजेरी लावली आहे.

राज्यात उन्हाचा चटका आणि उकाडा कायम असून, अनेक ठिकाणी विजा, मेघगर्जनेसह मुसळधार पावसाने दणका दिला आहे. आज (ता. २) दक्षिण कोकण, मध्य महाराष्ट्र, मराठवाडा आणि विदर्भात विजांसह पावसाची शक्यता आहे. तर उर्वरित राज्यात कमाल तापमान आणि उकाड्यातील वाढ कायम राहण्याचा अंदाज आहे.

गुरुवारी (ता. २) राज्यातील पावसाचा इशारा (सौजन्य : हवामान विभाग) :

विजांसह पावसाचा इशारा (येलो अलर्ट) :

कोकण : रायगड, रत्नागिरी, सिंधदुर्ग.

मध्य महाराष्ट्र : नाशिक, नगर, पुणे, सातारा, सांगली, कोल्हापूर.

मराठवाडा : औरंगाबाद, जालना, बीड, उस्मानाबाद.

विदर्भ : बुलडाणा, अकोला, वाशीम, अमरावती, वर्धा, यवतमाळ, नागपूर, भंडारा, गोंदिया, चंद्रपूर, गडचिरोली.