नागपूरः महाराष्ट्र पशू व मत्स्य विज्ञान विद्यापीठ आणि इस्राईलच्या पर्यटन खात्यादरम्यान सामंजस्य करार करण्यात आला आहे. इंडो-इस्राईल विद्यार्थ्यांच्या शिक्षणाची परिणामकारकता वाढविणे असा या कराराचा उद्देश आहे.

इस्राईलच्या पर्यटन खात्याचे भारतीय पर्यटन संचालक सामी याहिया आणि विद्यापीठाचे कुलसचिव सचिन कलंत्रे यांनी करारावर स्वाक्षरी केली. याप्रसंगी विद्यापीठाने महाराष्ट्राचे राज्यपाल कार्यालय आणि इस्राईलच्या पर्यटन खात्याचे इंडो-इस्राईलच्या विद्यार्थ्यांच्या अनुभवात्मक कार्यक्रमांना चालना देण्याकरिता घेतलेल्या पुढाकाराबद्दल आभार मानले. इंडो-इस्राईल विद्यार्थ्यांच्या अनुभवात्मक कार्यक्रमांना चालना देणे, शिक्षणाची परिणामत्कता वाढविणे, उद्योजकतेबाबत जागरूकता तसेच संशोधन आणि नावीन्यपूर्ण तंत्रज्ञान असा उद्देश या सामंजस्य कराराचा आहे.

या वेळी कुलगुरू डॉ. आशिश पातूरकर, गोवर्धन इकोविलेजचे मुख्य कार्यकारी अधिकारी पुष्करना यांचित, ‘माफसू’चे कार्यकारी परिषद सदस्य तापेश्‍वर वैद्य, संशोधन संचालक डॉ. एन. व्ही. कुरकुरे, विस्तार संचालक डॉ. अनिल भिकाने, अधिष्ठाता (निम्न शिक्षण) डॉ. सुनील सहातपूरे, अधिष्ठाता (मत्स्य विज्ञान) डॉ. एस. डब्ल्यू. बोंडे, नियंत्रक (वित्त व लेखा) शुभांगी धुर्वे यांच्यासह अधिकारी उपस्थित होते. सूत्रसंचालन डॉ. महेश जावळे यांनी केले. प्रज्ञेय ताकसांडे यांनी आभार मानले.