बुलडाणा ः देशात कापूस दरामध्ये (Cotton Rate) सातत्याने घट होत असताना ऑस्ट्रेलियाकडून तीन लाख गाठी, अर्थात ५१ हजार टन कापूस आयात (Cotton Import) करणार आहे. केंद्र सरकारच्या मार्फत कापूस आयात होणार असल्याने देशातील कापसाचे भाव कमी होतील.

याचा शेतकऱ्यांवर परिणाम होईल. तुरीच्या आयातीलाही वर्षभराची मुदतवाढ दिल्याने दर पडतील. केंद्राच्या चुकीच्या आयात धोरणाचा फटका शेतकऱ्यांना बसणार आहे, असा आरोप राष्ट्रवादी काँग्रेसचे प्रदेश सरचिटणीस प्रसेनजित पाटील यांनी केले.

जळगाव जामोद येथे ३१ डिसेंबरला राष्ट्रवादी काँग्रेसने आंदोलन केले. या वेळी पाटील बोलत होते. पाटील म्हणाले, ‘‘सरकारच्या आयात धोरणामुळे आर्थिक संकटात सापडलेल्या शेतकऱ्यावर प्रचंड परिणाम होईल.

कापूस आयातीसोबतच तुरीच्या खुल्या बाजारातील आयातीला सुद्धा १ वर्षाची मुदतवाढ केंद्राने दिली. जिनिंग प्रेसिंग कारखानदार, व्यापारी, निर्यातदार यांच्या दबावाखाली येत केंद्र सरकारने शेतकरी विरोधी धोरण स्वीकारले आहे.’’ आंदोलकांनी केंद्र सरकार व केंद्रीय वाणिज्यमंत्री पीयूष गोयल यांच्या विरोधात नारेबाजी करीत निदर्शने केली.