Akola News : जून महिना शेवटच्या आठवड्यात पोहोचला तरी पावसाचा पत्ता नाही. शुक्रवारी (ता.२३) रात्री हलक्या स्वरूपाच्या काही काळ सरी आल्या. त्यानंतर शनिवारी (ता.२४) पुन्हा वातावरण उघडले. जिल्ह्यातील शेतकरी पावसाची चातकासारखी प्रतीक्षा करीत थांबलेला आहे.

एकीकडे मॉन्सूनचा पाऊस पूर्व विदर्भापर्यंत पोहोचला असताना पश्‍चिम विदर्भात अकोला, बुलडाणा व वाशीम जिल्ह्यांत मात्र अद्यापही दमदार पाऊस झालेला नाही. तीनही जिल्ह्यांत उष्णता वाढण्याची शक्यता हवामान खात्‍यातर्फे वर्तविण्यात आली आहे.

दरम्यान, शुक्रवारी (ता. २३) सायंकाळी अकोला व वाशीम जिल्ह्यांत काही भागांत रिमझिम पाऊस झाला. अकोला, बुलडाणा व वाशीम जिल्ह्यांतील शेतकऱ्यांना आणखी काही दिवस पावसाची प्रतीक्षाच करावी लागण्याची शक्यता आहे. हवामान खात्याच्या अंदाजानुसार ढगाळ वातावरण राहणार असले, तरी दमदार पावसाला सुरुवात मात्र २६ जूननंतर होण्याची शक्यता आहे.

बुलडाणा जिल्ह्यातील काही भागात शनिवारपासून पावसाची शक्यता वर्तविण्यात आली आहे. वाशीम जिल्ह्यात सायंकाळी काही भागांत हलक्या स्वरूपाचा पाऊस पडला. अकोला शहरातही रिझमिझ पाऊस सुरू झाला. मात्र पेरणी योग्य दमदार पावसाची प्रतीक्षाच आहे.

...अशी आहे १ ते २२ जूनपर्यंतची स्थिती

अकोला ः प्रत्यक्षात पाऊस ः ६.५ मिमी (तूट ९३ टक्के)

बुलडाणा ः प्रत्यक्षात पाऊस ः ९.२ मिमी (तूट ८९ टक्के)

वाशीम ः प्रत्यक्षात पाऊस ः २०.८ मिमी (तूट ८१ टक्के)

सध्याचे तापमान

अकोला ः ३९.२

बुलडाणा ः ३६.८

वाशीम ः ३७.६