Ratnagiri Rain : देवरूख, रत्नागिरी, राजापुरात पावसाची हजेरी

Ratnagiri Rain News : देवरूखसह रत्नागिरी, राजापूर तालुक्यांत शुक्रवारी (ता. २३) दुपारपर्यंत पडलेल्या पावसाच्या सरींनी नागरिकांसह शेतकऱ्यांना दिलासा दिला. रत्नागिरी शहरात सायंकाळपर्यंत पावसाची विश्रांतीच होती.

जून महिना संपत आला तरीही मोसमी पाऊस नसल्याने पाणीटंचाईची तीव्रता वाढत होती. त्याबरोबरच खरिपातील पेरण्यांचेही वेळापत्रक कोलमडले. ज्या शेतकऱ्यांनी पेरण्या केल्या आहेत, त्यांन रोप रुजून येण्याची शंका आहे.

नद्या, नाले, धरणे कोरडी पडलेली आहेत. हवामान विभागाकडून २३ जूनला पावसाची शक्यता वर्तवण्यात आली होती. मृग नक्षत्र संपून आर्द्रा नक्षत्र सुरू झाले तरी, मॉन्सूनचे अपेक्षित असलेले दणक्यात आगमन अद्याप झालेले नाही.

पेरणीयोग्य पाऊस न झाल्याने अनेक शेतकऱ्यांची पेरणीची कामे खोळंबली आहेत. लांबणीवर पडत चाललेल्या या पेरणीने शेतकऱ्यांची चिंता वाढत चालली आहे. त्यामुळे मृगाने मारले असले तरी, आर्द्रा तरी तारणार का, असा प्रश्‍न शेतकऱ्यांना सतावत आहे.

शुक्रवारी (ता. २३) सकाळी रत्नागिरी शहरात हलकी सर पडून गेली. तर ग्रामीण भागात बराचवेळ पाऊस झाला. देवरुखमध्ये दुपारी मुसळधार पावसाची एक सर अर्ध्या तासाहून अधिक काळ पडली. त्यामुळे हवेत गारवा निर्माण झाला. रत्नागिरी तालुक्यातील समुद्र किनारी भागामध्ये वेगवान वारे वाहत होते.

या वाऱ्यांबरोबर अभाळ भरून येत होते, पण कालांतराने पुन्हा सूर्यदर्शन होत होते. ज्या परिसरात पाऊस पडला तेथे पेरण्यांचा मार्ग मोकळा झाला. राजापुरात सकाळपासून पाऊस पडत होता. म्हणावा तितकासा जोर नसला तरी, पडणाऱ्या सरींनी जमिनीमध्ये ओलावा निर्माण झाला.