Parbhani Rain News : यंदाचा (२०२३) पावसाळा सुरु होऊन दीड महिन्याचा कालावधी उलटला आहे तरी अद्याप परभणी जिल्ह्यातील परभणी, जिंतूर, सेलू, मानवत, गंगाखेड, पालम, पूर्णा या ७ तालुक्यातील १३ मंडलात १०० मिलिमीटर देखील पाऊस झालेला नाही. परिणामी जमीन कोरडी आहे.

पुरेशा ओलाव्याअभावी खरिपाची पेरणी रखडली इतरही अनेक मंडलातही अपुऱ्या ओलाव्यामुळे उगवण व्यवस्थित होत नाही. दुबार पेरणी करावी लागत आहे.असून शेतकऱ्यांच्या अडचणी वाढल्या आहेत.

यावर्षीच्या पावसाळ्यात परभणी जिल्ह्यात सोमवार (ता. १७) पर्यंत एकूण १०० मिलिमीटर पेक्षा कमी पाऊस झालेल्या मंडळांमध्ये दूधगाव ६६.४, वाघी धानोरा ७२.७, कावलगाव ७३.७, चुडावा ७४, झरी ७८.५, रामपुरी ८१.८, पिंपळदरी ८२.८, जिंतूर ८४.८, बामणी ८७.९, सेलू ९१.६, आडगाव ९३.२, बनवस ९७.२, दैठणा ९८.९ मिलिमीटर या १३ मंडळाचा समावेश आहे. याशिवाय उर्वरित ३९ मंडलात आजवर अपेक्षित सरासरी एवढाही पाऊस झालेला नाही.

पेरणीसाठी किमान १०० मिलिमीटर पाऊस आवश्यक आहे. यंदाच्या जून महिन्यात पावसाची तूट निर्माण झाली. त्यानंतरही सर्व मंडलांमध्ये पडणाऱ्या पावसाचे प्रमाण एकसारखे नाही. सर्वदूर पेरणी नाही. बांधावर गवत वाढले नाही. उगवण झालेल्या पिकाची हरिण, निलगाय, रानडुक्कर आदी प्राण्यांकडून नासाडी होत आहे. पेरण्यास उशीर झाल्यामुळे उत्पादकतेत घट येऊ शकते.

दरम्यान, परभणी हिंगोली जिल्ह्यातील ८२ मंडलात सोमवारी (ता. १७) सकाळी आठ पर्यंतच्या २४ तासांत अत्यंत हलका ते मध्यम पाऊस झाला. परभणी जिल्ह्यातील सर्व ५२ मंडळात अत्यंत हलका ते मध्यम पाऊस झाला. जिल्ह्यात गेल्या २४ तासांत सरासरी ८.४ मिलिमीटर, जुलै महिन्यात एकूण सरासरी ७५.३ मिमी तर १ जून पासून आजवर एकूण सरासरी १३०.८ मिलिमीटर पाऊस झाला आहे.

हिंगोली जिल्ह्यातील ३० मंडलात अत्यंत हलका ते मध्यम पाऊस झाला. जिल्ह्यात गेल्या २४ तासांत सरासरी ५.१ मिमी, जुलै महिन्यात आजवर एकूण १११.७ मिमी तर १ जून पासून आजवर एकूण सरासरी १५६.८ मिमी पाऊस झाला. हिंगोली जिल्ह्यत एकही मंडलात आजवर अपेक्षित सरासरीएवढा पाऊस झाला नाही.