Raigad Irshalwadi News : रायगड जिल्ह्यातील इर्शाळगड जवळील इर्शाळवाडी येथे भूस्खलन झाल्याने सुमारे १६ जणांना जीव गमवावा लागला. तर अनेक जण अद्यापही ढिगाऱ्याखाली अडकल्याची भिती आहे. दरम्यान याठिकाणी महाराष्ट्रातून अनेक सेवाभावी संस्था मदतीसाठी धावत आहेत. यासाठी कोल्हापूर जिल्ह्यातील व्हाईट आर्मीची टीम घटनास्थळी पोहोचली आहे.

दरम्यान लोकांच्या मदतीसाठी व्हाईट आर्मीचे पनवेल येथील जवान सुधीर गोरेंसह दहा जणांची टीम दुर्घटनास्थळी तातडीने पोहोचली असून एनडीआरएफ व स्थानिक प्रशासनासोबत मदतकार्यात सक्रिय झाली आहे. याचबरोबर काल(ता.२०) गुरुवारी कोल्हापुरातून आणखी १० जणांची टीम मदत साहित्य घेऊन रायगडाच्या दिशेने रवाना झाली.

काल मदत कार्यासाठी व्हाईट आर्मीच्या दोन टीम पनवेल व कोल्हापूर येथून रवाना झाल्या. पनवेलची टीम सकाळीच दुर्घटनास्थळी पोहोचली असून त्यांनी प्रत्यक्ष मदतकार्य सुरू केले आहे.

यावेळी व्हाईट आर्मीचे अध्यक्ष अशोक रोकडे, सुनील दळवी, सचिन भोसले, प्रशांत शेंडे, विनायक भाट, रूनाल राऊत, शैलेश रावण, अनिल बिरजे, सुमित साबळे, योगेश जाधव, डॉ. शर्वरी रोकडे आदी उपस्थित होते.

पुणे जिल्हा प्रशासन तातडीने सतर्क

रायगड जिल्ह्यातील इर्शाळवाडी येथे दुर्दैवी घटना घडल्यानंतर पुणे जिल्हा प्रशासन खडबडून जागे झाले. ज्या ठिकाणी धोकादायक दृश्य असेल त्या ठिकाणी तत्काळ पाहणी करून उपाययोजना कराव्यात अशा सूचना सरकारने दिल्याने मावळचे तहसीलदार व शासकीय अधिकाऱ्यांनी मावळ तालुक्यातील धोकादायक असलेल्या आठ गावांची पाहणी केली. त्यासोबतच स्थानिकांना सूचना केल्या आहेत.

पुणे जिल्ह्याच्या मावळ तालुक्यातील भाजे, लोहगड, बोरज तुंग, माळवाडी, माऊ गबाळेवस्ती, माऊ मोरमाची वाडी, भुशी, आदी दरडप्रवण धोकादायक ठिकाणी तहसीलदार विक्रम देशमुख, बांधकाम खात्याचे उपअभियंता धनराज पाटील, शाखा अभियंता श्रीनिवास पांचाळ, विस्तार अधिकारी बाळासाहेब वायकर, माणिक साबळे यासह अन्य शासकीय अधिकारी उपस्थित होते.