Nashik News : लोकनेते ए. टी. पवार कळवण कृषी उत्पन्न बाजार समितीच्या कार्यक्षेत्रात कोणत्याही परिस्थितीत ‘नाफेड, एनसीसीएफ’मार्फत कांदा खरेदी करण्यात येऊ नये तसेच थेट पणन परवाने, खासगी बाजार समिती, थेट खरेदी केंद्र यांना परवानगी देण्यात येऊ नये, असा महत्त्वपूर्ण ठराव बाजार समितीच्या वार्षिक सर्वसाधारण सभेत करण्यात आला.

बाजार समितीच्या सभागृहात झालेल्या सभेच्या अध्यक्षस्थानी सभापती धनंजय पवार होते. व्यासपीठावर कळवणचे नगराध्यक्ष कौतिक पगार, काँग्रेसचे प्रदेश सचिव यशवंत गवळी, राष्ट्रवादी काँग्रेसचे तालुकाध्यक्ष राजेंद्र भामरे, शेतकरी सहकारी संघाचे अध्यक्ष राजेंद्र पवार, कमको अध्यक्ष योगेश महाजन, कांदा व्यापारी योगेश शिंदे, शिवसेना संपर्क प्रमुख संभाजी पवार, उपसभापती दत्तू गायकवाड, राजेंद्र आहेर, विष्णू बोरसे आदी व्यासपीठावर उपस्थित होते.

हा ठराव शासनाला सादर करण्याची सूचना देखील सभेत करण्यात आली. केंद्र शासनाने कांदा निर्यातीवर लावलेले वाढीव ४० टक्के शुल्क रद्द करण्याची मागणी संचालक योगेश महाजन, योगेश शिंदे यांनी या वेळी केली. बाजार समितीला आर्थिक वर्षात ४१ लाख ९६ हजार रुपये नफा झाला असून, विद्यमान संचालक मंडळाने सुरू केलेल्या कामकाजात खर्चात काटकसर केली.

सचिव रवींद्र हिरे यांनी मागील सभेचे इतिवृत्त वाचन करून आर्थिक वर्षाचा अहवाल वाचन केले. आर्थिक पत्रकाबाबत विचार विनिमय करण्यात येऊन नाकोडा, कनाशी, उपआवारातील कामकाज, विविध विकास बांधकाम यांना मंजुरी घेण्यात आली.

या वेळी संचालक सोमनाथ पवार, बाळासाहेब गांगुर्डे, सुधाकर खैरनार, शशिकांत पवार, प्रवीण देशमुख, दिलीप कुवर, पंढरीनाथ बागूल, प्रवीण देशमुख, शीतलकुमार अहिरे, भरत पाटील, सुनीता जाधव, रेखा गायकवाड, बाळासाहेब वराडे, गंगाधर खांडवी, भूषण बच्छाव, दत्तू गांगुर्डे, जिभाऊ वाघ आदी उपस्थित होते.