Mumbai News : जळगाव येथील ‘शासन आपल्या दारी’ या उपक्रमात न येणाऱ्या नागरिकांना रेशन कार्ड रद्द करण्याची धमकी दिली जात आहे. ही राज्य सरकारची हुकूमशाही आहे, असा आरोप राष्ट्रवादीचे प्रदेशाध्यक्ष जयंत पाटील यांनी मंगळवारी (ता. २७) दिला. ही हुकूमशाही असून, अशा हुकूमशाहीला महाराष्ट्र जागा दाखवेल, असा इशाराही त्यांनी दिला आहे.

‘मुख्यमंत्री महोदय, हे काय सुरू आहे?’ असा सवालही पाटील यांनी विचारला आहे. ‘शासन आपल्या दारी’ या मुख्यमंत्र्यांच्या कार्यक्रमाला उपस्थित राहण्यासाठी लोकांना धमकीवजा संदेश पाठवले जात असल्याचे समोर आल्याचा उल्लेख पाटील यांनी सोशल मीडियावर करत राज्य सरकारवर टीका केली आहे.

जळगाव महापालिकेने लाभार्थ्यांना ‘शासन आपल्या दारी’ या कार्यक्रमासाठी यावे, अन्यथा पुढील चार महिने रेशन बंद करण्यात येईल, अशा आशयाचे संदेश पाठविले होते. त्यावरून सत्ताधाऱ्यांवर टीका होत आहे.

याप्रकरणी दिलेले आदेश मागे घेण्यात येतील असे जिल्हाधिकारी अमन मित्तल यांनी सांगितले असले, तरी हे संदेश व्हायरल झाल्याने राज्य सरकारसह सरकारी यंत्रणेला नामुष्कीला सामोरे जावे लागले आहे.

पाटील यांनी दिलेल्या पत्रकात म्हटले आहे, ‘शासन आपल्या दारी’ या मोहिमेसाठी मुख्यमंत्री एकनाथ शिंदे जळगावात असणार असून, या कार्यक्रमासाठी अधिकाधिक गर्दी जमवावी यासाठी शासकीय यंत्रणांचा दुरुपयोग केला जात आहे.

रेशन कार्डधारकांनी सभेला उपस्थित राहणे आवश्यक आहे. अन्यथा, त्यांचे रेशन कार्ड रद्द करून पुढील चार महिने धान्य पुरवले जाणार नाही, असा धमकीवजा संदेश पसरविण्यात येत आहे.