नागपूर ः पंतप्रधान नरेंद्र मोदी (Narendra Modi) नागपूरमध्ये रविवारी (ता. ११) येणार असून त्यांच्या हस्ते समृद्धी महामार्गाचे उद्‍घाटन (Samrudhhi Mahamarg Inauguration) करण्यात येणार आहे. नागपुरमध्ये पंतप्रधान सुमारे सव्वातीन तास असणार आहेत. सकाळी ९.२५ वाजता ते दिल्लीवरून नागपूर विमानतळावर येणार आहेत. १२.५० वाजता ते परतीच्या प्रवासाला निघणार आहेत.

पंतप्रधान मोदी यांच्या हस्ते फक्त समृद्धी महामार्गच नव्हे तर नागपूर मेट्रो रेल्वेच्या दुसऱ्या टप्प्याचे उद्‍घाटन होणार आहे. सोबतच नागपूर रेल्वे स्थानकावर ते वंदे भारत एक्सप्रेसला हिरवा झेंडा दाखवणार आहेत. मोदी यांचा अधिकृत दौरा प्रशासनाला प्राप्त झाला आहे.

त्यानुसार ते सकाळी ७.५० ला दिल्ली विमानतळावरून निघणार आहेत. नागपूर विमानतळावर ते ९.२५ला दाखल होतील. तेथून ते गाडीने ९.४० वाजता नागपूर रेल्वे स्थानकावर पोहचतील. ९.४५ ते ९.५५ अशी दहा मिनिटे ते येथे थांबणार आहेत.

वंदे भारत एक्स्पेसला हिरवी झेंडी दाखवून ते मेट्रो रेल्वेच्या झिरो माईल चौकातील फ्रिडम पार्क प्रदर्शनाला भेट देणार आहे. येथूनच ते मेट्रोतून खापरी स्थानकापर्यंत सफर करणार आहेत. १०.३० वाजता केपी ग्राऊंड ते ऑटोमोटिव्ह चौक तसेच सीताबर्डी ते प्रजापतीनगर या दोन मेट्रो रेल्वे मार्गाचे लोकार्पण करतील.

त्यानंतर १०.४५ वाजता समृद्धीच्या झिरो माईल येथून समृद्धी महामार्गावर १० किलोमीटर प्रवास करून ते उद्‍घाटन करतील. त्यानंतर एम्सच्या टेंपल ग्राउंडवर ते संबोधित करणार आहेत.