Kolhapur News : जिल्ह्यातील धरणक्षेत्रात तुफान वृष्टी सुरू असल्याने जिल्ह्यातील नद्यांच्या पाणीपातळी मोठी वाढ झाली आहे. यामुळे जिल्ह्यातील ८२ बंधारे पाण्याखाली गेले असून अनेक गावांचा संपर्क तुटला आहे.

तर पंचगंगा नदीची इशारा पातळीकडे वाटचाल सुरू असून पावसाचा जोर कायम राहिल्यास जिल्ह्यात पूरस्थिती निर्माण होण्याची शक्यता आहे. राधानगरी धरण क्षेत्रात रविवारी (ता. २३) संपलेल्या २४ तासांत २१० मिमी पाऊस झाला.

हवामान विभागाने शनिवारी (ता. २२) जिल्ह्यात ‘यलो अलर्ट’ जारी केला होता. जोरदार पावसामुळे नद्यांच्या पाणीपातळीत झपाट्याने वाढ झाली असून ८२ बंधारे पाण्याखाली गेले आहेत. पंचगंगा नदीची पातळी ३७.९ इंच इतकी होतो. नदीची इशारा पातळी ३९ फूट ८ इंच असून, धोका पातळी ४३ फुटांपर्यंत आहे. रविवारी सकाळी ८ च्या सुमारास ‘पंचगंगे’चे पाणी गायकवाड वाड्यापर्यंत पोहोचले असून, गंगावेश ते शिवाजी पूल रस्ता बंद करण्यात आला.

सुतार वाडा येथे रात्री व सकाळी नागरिकांना स्थलांतरित होण्याच्या सूचना अग्निशामक विभागाकडून देण्यात आल्या. दूधगंगा नदीवरील बाचणी येथील बंधारा पाण्याखाली गेला आहे. राधानगरी धरण ७७ टक्के भरले असून १३५० क्युसेकने जलविसर्ग सुरू आहे. २६ जुलैपर्यंत ‘ऑरेंज अलर्ट’चा अंदाज वर्तवल्यामुळे पावसाचा जोर कायम राहण्याची शक्यता आहे.

१३ प्रमुख जिल्हा मार्ग आणि ६ राज्य मार्ग बंद झाल्यामुळे पर्यायी मार्गाने वाहतूक सुरू आहे. पंचगंगेची वाटचाल इशारा पातळीकडे सुरू असल्यामुळे जिल्ह्यातील नागरिकांनी दक्ष रहावे, असे आवाहन जिल्हाधिकारी राहुल रेखावार यांनी केले. अतिवृष्टीमुळे जिल्ह्यातील ६ राज्यमार्ग व १६ जिल्हामार्ग बंद झाले असल्याची माहिती सार्वजनिक बांधकाम विभागाच्या विशेष प्रकल्प समन्वय अधिकाऱ्यांनी दिली.