Sindhudurg News : सिंधुदुर्ग जिल्ह्यात मुसळधार पाऊस सुरूच असून शुक्रवार (ता. ७) पहाटेपासून जिल्ह्याच्या बहुतांश भागात मुसळधार पाऊस सुरू आहे. गुरुवारी (ता. ६) झालेल्या वादळी पावसात १३ हून अधिक मालमत्तांचे नुकसान झाले.

काही गावांमध्ये फळझाडे मोडून पडली. वादळाने महावितरणचे मोठे नुकसान झाले. दरम्यान पावसामुळे धरणामध्ये पाण्याची आवक झपाट्याने होत आहे. नदी-नाल्यांच्या पाणीपातळीतदेखील वाढ होत आहे.

जिल्ह्यात गेल्या तीन-चार दिवसांपासून मुसळधार पाऊस सुरू आहे. गुरुवारी दिवसभर मुसळधार पाऊस सुरू होता. सायकांळी जिल्ह्याच्या काही भागांत वादळी वाऱ्यांसह मुसळधार पाऊस झाला. देवगड, खारेपाटण, तळेरे, वैभववाडी, सावंतवाडी, कुडाळ, मालवणच्या काही भागांना मुसळधार पावसासह वादळी वाऱ्याचा तडाखा बसला.

यामध्ये अनेक ठिकाणी पडझड झाली. अनेक झाडे उन्मळून आणि मोडून पडली. यातील काही झाडे वीज वाहिन्यांवर कोसळल्याने वीज खांब वाकणे, वीज वाहिन्या तुटून वीजप्रवाह खंडित होणे, असे प्रकार झाले. खारेपाटण येथे मुख्य वीज वाहिन्यांवर झाडे कोसळली. त्यामुळे खारेपाटण आणि वैभववाडीतील वीजपुरवठा खंडित होता.

वादळाने सौंदाळे ताह्मणकरवाडी (ता. देवगड) येथील एका शेतकऱ्याची आंब्याची झाडे उन्मळून पडली. जिल्ह्यात १३ हून अधिक घरे, गोठे आदी मालमतांवर झाडे कोसळून लाखोंचे नुकसान झाले. कुडाळ येथील वालावल-कवठी मार्गावर झाड कोसळले.

सावंतवाडीतील देवसुत शाळेच्या शेडवर झाड कोसळले. सोनाळी वाणीवाडी येथील नळपाणी पुरवठा योजनेची विहीर कोसळली. धरणक्षेत्रात पावसाचे प्रमाण अधिक असल्यामुळे धरणांत पाण्याची आवक मोठ्या प्रमाणात होत आहे.

शेतीच्या कामांना गती

जिल्ह्यात यावर्षी मॉन्सूनचे आगमन झाल्यामुळे शेतीची कामे रखडली होती. परंतु आता सुरुवातीला तयार केलेल्या भात रोपवाटिकांतील भातरोप पुनर्लागवडीला सुरुवात झाली आहे. लागवडयोग्य पाऊस पडत असल्यामुळे शेतशिवारे गजबजली आहेत.