सातारा : सातारा, खटाव, कोरेगाव तालुक्यांतील बरीचशी गावे ही सिंचनापासून वंचित (Satara District Water Issue) आहेत. या गावांचा समावेश नजीकच्या सिंचन योजनेत (Irrigation Scheme) करणे अथवा या गावांना नवीन सिंचन प्रकल्पातून पाणी देण्यासाठी फेर सर्वेक्षण करावे, असे निर्देश मुख्यमंत्री एकनाथ शिंदे (Eknath Shinde) यांनी दिले.

या तिन्‍ही तालुक्यांतील वंचित गावांना सिंचनाचे पाणी देण्याबाबत मुख्यमंत्री श्री. शिंदे यांच्या अध्यक्षतेखाली मुंबई येथे बैठक झाली.

या बैठकीस आमदार महेश शिंदे, जलसंपदा विभागाचे अतिरिक्त मुख्य सचिव दीपक कपूर, साताऱ्याचे जिल्हाधिकारी रूचेश जयवंशी, महाराष्ट्र कृष्णा खोरे विकास महामंडळाचे कार्यकारी संचालक अतुल कपोले, मुख्य अभियंता हेमंत धुमाळ, अधीक्षक अभियंता जयंत शिंदे, कार्यकारी अभियंता अ. प. निकम आदी उपस्थित होते.

मुख्यमंत्री श्री. शिंदे म्हणाले, ‘‘कोयना धरणामध्ये बुडीत बंधारे बांधण्यात येणार असून, उन्हाळ्यात कोयना धरण परिसरातील गावांना कायमस्वरूपी पाणी उपलब्ध करून देण्यात येईल.

प्रस्तावित सोळशी धरणाबाबत सर्वेक्षण करून सातारा जिल्ह्यातील दुष्काळी वंचित भागाला पाणी देण्यात येईल. नेर तलावाखालील गावांना उजवा व डावा कालवा काढून पाणी देण्यात यावे.

सातारा तालुक्यातील वर्णे, निगडी, देगाव, देवकरवाडी, कारंडवाडी व राजेवाडी ही गावे कायमस्वरूपी सिंचनापासून वंचित आहेत.

या गावांत पाणी देण्यासाठी उपसा सिंचन योजना करून ते पाणी वर्णे व निगडीच्या टेकडीवरती टाकून कालव्याद्वारे सिंचनास पाणी देणे शक्य आहे.’’

या अनुषंगाने वर्णे व निगडी उपसा सिंचन योजनेचे सर्वेक्षण करून प्रस्ताव सादर करण्याचे निर्देश मुख्यमंत्र्यांनी दिले.

वेटणे, रणसिंगवाडी गावांना आंधळी बोगद्यातून उपसाद्वारे पाणी देण्याचा निर्णय या वेळी घेण्यात आला. पाणी वापराचा फेर आढावा घेऊन दोन टीएमसी पाणी देण्याचा निर्णय झाला.