Akola News : अकोला डॉ. पंजाबराव देशमुख कृषी विद्यापीठाला उपजिल्हाधिकारी दर्जाचे अधिकारी सुधीर राठोड हे कुलसचिव म्हणून रुजू झाले आहेत. ते यापूर्वी वनमंत्री सुधीर मुनगंटीवार यांचे विशेष कार्य अधिकारी म्हणून कार्यरत होते. नुकतीच शासनाने त्यांची नियुक्ती केली असून ते रुजू झाले आहेत.

गेल्या काही वर्षांत या विद्यापीठाला पूर्णवेळ कुलसचिव पदावर अधिकारी मिळत नव्हता. त्यामुळे हा कारभार प्रभारींच्या खांद्यावर सुरू होता. मध्यंतरी म्हणजेच मे महिन्यात या पदावर अकोल्याचे तत्कालीन निवासी उपजिल्हाधिकारी संजय खडसे यांची प्रतिनियुक्तीने शासनाने बदली केली. मात्र त्यांना येथे रुजू न करता ताटकळत ठेवण्यात आले.

अखेर त्यांना आता उपविभागीय अधिकारी म्हणून यवतमाळ जिल्ह्यात पाठवण्यात आले आहे. तर कुलसचिव म्हणून राठोड यांची नियुक्ती झाली. विद्यापीठाचे विदर्भातील ११ जिल्ह्यांचे मोठे कार्यक्षेत्र आहे. विद्यापीठ प्रशासकीय कारभारासोतच परीक्षा, शिक्षण, नियुक्ती प्रक्रिया, बदल्या, विद्यापीठाची जमीन, मालमत्तेचा कस्टोडिअन म्हणून हे पद महत्त्वाचे मानले जाते.