पुणेः राज्यात मागील काही दिवसांपासून थंडीची चाहूल (Winter In Maharashtra) लागली आहे. सध्या राज्यात सकाळी किमान तापमानात (Minimum Temperature) घट होऊन दुपारी काहीशी वाढ झालेली दिसते. त्यामुळे सकाळी थंडी (Cold Weather) आणि दुपारी उन्हाचा चटका (Heat) जाणवतोय. सध्याचे वातावरण रब्बीच्या पेरणीसाठी (Rabi Sowing) पोषक असल्याने शेतकऱ्यांनी पेरणीला प्राधान्य दिलंय. राज्यात अनेक भागात शेतकऱ्यांनी हरभरा आणि गहू पेरणी (Wheat Sowing) सुरु केली आहे.

राज्याच्या अनेक भागांमध्ये किमान तापमान १५ अंश सेल्सिअसच्याच्या खाली पोचले. तर बहुतांशी ठिकाणचं तापमान १८ अंश सल्सिअपेक्षा कमी आहे.

त्यामुळे सकाळी थंडीचं प्रमाण वाढलं. मध्य महाराष्ट्रातील पुणे आणि महाबळेश्वर येथे सर्वात कमी १३.४ अंश सेल्सिअस तापमानाची नोंद झाली. तर कोल्हापूर येथे सर्वाधिक १७.४ अंश सल्सिअस किमान तापमान होते.

मराठवाड्यातही थंडीचं प्रमाण वाढलं. औरंगाबाद येथे विभागातील सर्वांत कमी १३.३ अंश सेल्सिअस किमान तापमान होतं. तर नांदेड येथे विभागातील सर्वाधिक किमान तापमान १७ अंश सेल्सिअसच्या दरम्यान राहीलं.

विदर्भात किमान तापमान तुलनेत काहीसं जास्तच होतं. त्यामुळे थंडीचं प्रमाणही अनेक भागात कमी राहीलं. विदर्भात सर्वात कमी किमान तापमान यवतमाळ येथे १४.५ अंश सेल्सिअसवर होते. तर सर्वाधिक १७.७ अंश सेल्सिअस किमान तापमान अकोल्यात नोंदले गेले.