ॲग्रोवन वृत्तसेवा

Heavy Rains Destroyed Crops : अमरावती ः विदर्भाच्या बहुतांश जिल्ह्यात अतिवृष्टी नोंदविण्यात आली. अमरावती विभागातील अकोला, वाशीम, बुलडाणा, अमरावती, यवतमाळ या पाच जिल्ह्यांत तब्बल सहा लाख हेक्‍टरवरील पिकांचे नुकसान झाल्याचा प्राथमिक अहवाल कृषी विभागाने शासनाला सादर केला आहे.

यवतमाळ जिल्ह्याच्या काही मंडलांत २०० मिलिमीटरपेक्षा अधिक पाऊस २४ तासांत कोसळला. त्यामुळे नद्या, नाल्यांना पूर येत त्याचे पाणी काठावरील शिवारात शिरले. पावसामुळे देखील अनेक शिवारात उभी पिके पाण्याखाली गेल्याने ती उद्ध्वस्त झाली. या शेतकऱ्यांसमोर आता दुबार पेरणीसाठी पैशाची तजवीज करण्याचे मोठे आव्हान निर्माण झाले आहे. कृषी विभागाच्या प्राथमिक अहवालात एकट्या यवतमाळ जिल्ह्यांत २ लाख ३७ हजार ८१३ हेक्‍टरवर नुकसान झाल्याची नोंद आहे. त्यामध्ये खरडून गेलेल्या ७२४९.१० हेक्‍टर क्षेत्राचाही समावेश आहे.

खरडून गेलेल्या भागातून सुपीक मातीही वाहून गेली, परिणामी या क्षेत्रात पीक घेणेही शेतकऱ्यांना आता शक्‍य होणार नाही, अशी स्थिती आहे. जिल्ह्यांमध्ये बुलडाणा जिल्हा दुसऱ्या क्रमांकावर आहे. या जिल्ह्यांत १ लाख ६४ हजार ६७७ हेक्‍टर क्षेत्रावरील कापूस, सोयाबीन, मका, तूर, मूग, उडीद या पिकांचे नुकसान नोंदविले.

बुलडाण्यात खरडून गेलेले क्षेत्र १२ हजार २६४ हेक्‍टर आहे. अकोला जिल्ह्यात १ लाख ४१ हजार ३२० हेक्‍टर क्षेत्रातील पिकाचे नुकसान झाले तर ३६९७ हेक्‍टर जमीन खरडून गेली. अमरावती आणि वाशीम जिल्ह्यांत सर्वांत कमी नुकसान नोंदविण्यात आले आहे. अमरावती जिल्ह्यात ४० हजार २१९ हेक्टरचे नुकसान झाले आहे.

...अशी आहेत बाधित गावे

बुलडाणा ४५९

अकोला ५८३

वाशीम १२०

यवतमाळ १५३२

अमरावती ३५४