Akola News या भागातील शेतकऱ्यांना पुन्हा नैसर्गिक आपत्तीला (Natural Calamity) सामोरे जावे लागले. गुरुवारी (ता. २०) सायंकाळी मोठ्या प्रमाणात वादळी वारा, पाऊस झाल्याने पिकांचे नुकसान (Crop Damage) झाले. घरांवरील पत्रे उडून गेले. प्रामुख्याने सातपुड्याच्या पायथ्याशी असलेल्या तेल्हारा, संग्रामपूर, जळगाव जामोद या तालुक्यांत वादळाचा जोरदार तडाखा बसला.

तेल्हारा तालुक्यात हिवरखेड, दानापूर आणि आजूबाजूच्या गावांमध्ये मेघगर्जनेसह वादळी पाऊस बरसला. अचानकच आलेल्या पावसामुळे शेतकऱ्यांची तारांबळ उडाली. शेतात असलेला कांदा, गहू, टरबूज या पिकांचे मोठे नुकसान झाले. हिवरखेड- सोनाळा मार्गावर वारखेड फाट्याजवळ एक मोठे बाभूळचे झाड पडल्याने वाहतूक ठप्प झाली.

संग्रामपूर तालुक्यात टुनकी भागात वादळाने धुमाकूळ घातला. यामुळे झाडे पडली. ६० ते ७० घरांवरील पत्रे उडून गेली. जामोद परिसरात विजांच्या कडकडाटासह पाऊस झाला. कांदा पीक मोठ्या प्रमाणात भिजले. शेगाव तालुक्यातही पावसाने धुमाकूळ घातला.

बुलडाणा तालुक्यातील धाड व डोमरुळ परिसरात अचानक वादळी वाऱ्यांसह पाऊस झाला. त्यामुळे शेतकऱ्यांच्या मका, हरभरा सुड्या भिजल्या. लोणार तालुक्यात बाबूलखेड येथे वसंतराव श्रीराम हाडे यांच्या गोठ्यावर वीज पडून बैलजोडी ठार झाली. अकोला व परिसरात रात्री जोरदार वादळाने नागरिकांची धांदल उडाली. रात्री उशिरापर्यंत हे वादळ सुरूच होते.