भुकूम, ता. मुळशी ः राष्ट्रवादी काँग्रेसचे अध्यक्ष शरद पवार (Sharad Pawar) यांच्या वाढदिवसानिमित्त रविवारी (ता.१) रोजी भुकूम येथे बैलगाडी शर्यतीचे आयोजन करण्यात आले आहे. या शर्यती माजी सभापती स्व. तुकाराम हगवणे यांच्या स्मरणार्थ भरविण्यात येत असल्याचे नियोजन मंडळाचे माजी सदस्य राजाभाऊ हगवणे यांनी सांगितले.

बैलगाडा शर्यतीसाठी आंग्रेवाडी येथे खास मैदान तयार करण्यात आले आहे. स्पर्धेतील विजेत्यांना प्रथम क्रमांकास दोन लाख एकावन्न हजार रुपये व चषक देण्यात येणार आहे. एकूण पहिल्या आठ विजेत्यांना रोख रक्कम व चषक बक्षीस देण्यात येईल. स्पर्धेत सहभागी होणारे गाडा मालकास चषक देण्यात येणार आहे.

स्पर्धेसाठी विरोधी पक्ष नेते अजित पवार, खासदार सुप्रिया सुळे, आमदार रोहित पवार, राष्ट्रवादी काँग्रेसचे जिल्हा अध्यक्ष प्रदीप गारटकर व तालुक्यातील सर्व पक्षीय नेत्यांना यासाठी निमंत्रित करण्यात आले आहे. ही स्पर्धा रविवारी (ता.१) सकाळी आठ वाजता सुरू होणार आहे.