रावेर, जि. जळगाव : जिल्ह्यातील केळी उत्पादक शेतकऱ्यांचा (Banana Grower Farmers) किसान रॅक अनुदानावर (Kisan Rack Subsidy) पुन्हा सुरू व्हावा, यासाठी केळी उत्पादक शेतकरी २१ जुलैला दिल्ली येथे रेल्वे राज्यमंत्री रावसाहेब दानवे (Raosaheb danve) यांची भेट घेऊन त्यांना साकडे घालणार आहेत.

येथील रावेर स्टेशन फळबागायतदार युनियनचे अध्यक्ष रामदास पाटील, सचिव ॲड. आर. आर. पाटील व माजी उपाध्यक्ष हरीश गनवाणी हे या भेटीसाठी दिल्ली येथे पोचणार आहेत.

गेल्या १४ एप्रिलपासून रेल्वेने आणि केंद्र सरकारने शेतकऱ्यांचा निम्म्या भाड्याच्या अनुदानावरील किसान रॅक कोळसा वाहतुकीचे कारण पुढे करीत बंद केला होता. मात्र या किसान रॅकचे मंजूर अनुदान संपूर्ण खर्ची पडल्याने हा रॅक बंद करण्यात आला.

हा प्रश्न केवळ निवेदन देऊन सुटणार नाही तर त्यासाठी दिल्ली येथे जाऊन संबंधित मंत्र्यांची भेट घेणे आवश्यक असल्याची अपेक्षाही केळी उत्पादक शेतकऱ्यांनी व्यक्त केली होती. या शेतकरी शिष्टमंडळाची रेल्वे राज्यमंत्र्यांशी भेट खासदार रक्षा खडसे यांच्या माध्यमातून घेतली जाणार आहे.