Jalgaon News : ई पीक पाहणीबाबत यंदा शेतकऱ्यांमध्ये उदासीनता आहे. दोन-तीन तालुक्यांचा अपवाद वगळता इतर भागात याबाबत प्रतिसाद मिळत नसल्याची स्थिती आहे. फक्त ३१ हजार हेक्टरवरील क्षेत्रावर पीक लागवड या ई पीक पाहणीत दिसत आहे.

ई पीक पाहणीसाठी अॅपमधील जुने व्हर्जन काढून नवे व्हर्जन डाऊनलोड करण्याच्या सूचना देण्यात आल्या. अनेक शेतकरी जुन्याच व्हर्जनवर ई पीक पाहणीचा प्रयत्न करीत होते. परंतु त्यात अडचणी येत होत्या.

ही बाब लक्षात घेवून ९ ऑगस्ट रोजी जिल्हा प्रशासनाने पत्र जारी करून शेतकऱ्यांनी ई पीक पाहणी करावी व व्हर्जन - २ नव्याने डाऊनलोड करावे, अशा सूचना दिल्या. परंतु यासही प्रतिसाद मिळालेला नाही.

जळगाव जिल्ह्यात २५ हजार शेतकऱ्यांनी ३१ हजार हेक्टरवर पीक लागवडीसंबंधी ई पीक पाहणी केली आहे. जिल्ह्यात सात लाख ६७ हजार हेक्टरवर खरिपातील पिकांची लागवड अपेक्षित होती. यात ९ टक्के पेरणी झाली आहे. कापसाची सर्वाधिक पाच लाख ५२ हजार हेक्टरवर लागवड झाल्याचे प्रशासनाने मध्यंतरी म्हटले होते.

परंतु ई पीक पाहणीत पीक पेराच दिसत नाही. याचा अर्थ लागवड झाली आहे की नाही, हादेखील मुद्दा आहे. ई पीक पाहणीसाठी ग्रामपंचायतींच्या सहकार्याने कार्यवाही व्हावी. ग्रामपंचायतींत नियुक्त ऑपरेटरला अॅण्ड्रॉई़ड मोबाइल उपलब्ध करून द्यावा व शेतकऱ्यांना सहकार्य करावे, असाही मुद्दा उपस्थित केला जात आहे.

एकाच शेतकऱ्याला २० वेगवेगळ्या क्षेत्रांवरील पीक पाहणी करता येणे या अॅपमध्ये शक्य आहे. परंतु तरीदेखील ई पीक पाहणीला प्रतिसाद का मिळाला नाही, हा प्रश्न आहे. तलाठी ई पीक पाहणीची सक्ती करीत आहेत. आपल्याला अधिकारच नाहीत, असे शेतकऱ्यांना सांगितले जात आहे. यात वृद्ध, निरक्षर शेतकऱ्यांची अडचण होत आहे. अपवादात्मक स्थितीत तलाठ्यांनादेखील ई पीक पाहणीचे अधिकार दिले जावेत, असा मुद्दाही उपस्थित केला जात आहे.

ई पीकचा आम्हांला उपयोग काय?

पीकपाणी हवे तसे नाही. पाऊस नाही. ई पीक पाहणीचा उपयोग प्रशासनाला आकडेमोड करण्यापुरताच आहे. शेतकऱ्यांना त्याचा काय उपयोग, कुठून अॅण्ड्रॉई़ड मोबाईल आणायचा, असा प्रश्न शेतकरी उपस्थित करीत आहेत.