पुणे ः स्वातंत्र्याचा अमृत महोत्सव अभियानांतर्गत (Swatantrata Amrit Mahotsav) टपाल विभागाच्या (Postal Department) ‘फिलेटेली’ दिनानिमित्त भौगोलिक मानांकन (Geographical Indication ) प्राप्त आंबेमोहोर तांदूळ, पुरंदर अंजीर आणि ‘एक जिल्हा, एक उत्पादन’ विषयावरील पुणे जिल्ह्याच्या टोमॅटो आणि अंजीर या विशेष टपाल आवरण नुकतेच करण्यात आले.

कार्यक्रमाला पुणे विभागाचे पोस्टमास्टर जनरल रामचंद्र जायभाये, संचालक सिमरन कौर, डेक्कन फिलाटेलिक सोसायटीच्या अध्यक्षा डॉ. अंजली दत्ता, आर्मी फिलाटेलिक सोसायटीचे खजिनदार कर्नल आर. के. चव्हाण, अध्यक्ष अखिल महाराष्ट्र अंजीर उत्पादक संशोधन संघाचे अप्पासाहेब काळभोर, मुळशी तालुका आंबेमोहोर संवर्धन संघाचे हरीश मेंगडे आदी उपस्थित होते.

या वेळी जायभाये म्हणाले, ‘‘भौगोलिक मानांकन प्राप्त आंबेमोहोर तांदूळ, पुरंदर अंजीरचे महत्त्व विशेष टपाल पाकिटामुळे वाढणार आहे. उद्योग मंत्रालयाच्या वतीने ‘आत्मनिर्भर भारत’अंतर्गत पीएमएफएमई योजनेला प्रोत्साहन मिळण्यासाठी हे विशेष टपाल पाकिट देखील काढले आहे.

हे विशेष पाकिट पुणे मुख्य टपाल कार्यालयासह पुणे सिटी पोस्ट ऑफिस आणि पुणे टपाल क्षेत्रातील नगर, बारामती, कराड, पंढरपूर, सातारा, सोलापूर आणि श्रीरामपूर येथील सर्व मुख्य टपाल कार्यालयात विक्रीसाठी उपलब्ध आहे.’’