Maharashtra News : राज्यात सध्या सहा पशु वैद्यकीय महाविद्यालये आहेत. त्यात शिक्षण घेणाऱ्या विध्यार्थ्यांची संख्या कमी आहे. पशुधनाची काळजी घेण्याच्या दृष्टीने ही संख्या अत्यल्प आहे.

या पार्श्वभूमीवर राज्य सरकारकडून काल विधेयक मांडण्यात आले. यावर एकमताने राज्यात खासगी पशुवैद्यकीय महाविद्यालय सुरू करण्यास परवानगी देण्यात आली आहे.

महाराष्ट्र पशु व मत्स्य विज्ञान विद्यापीठाअंतर्गत राज्यात खासगी पशुवैद्यकीय महाविद्यालय सुरू करण्यास परवानगी देण्यात आली आहे. याबाबत पशुसंवर्धन, दुग्ध व्यवसाय विकास मंत्री राधाकृष्ण विखे पाटील यांनी मांडलेले विधेयक विधान परिषदेत बुधवारी एकमताने मंजूर झाले.

मागील काही वर्षांत विविध साथी आणि आजारांमुळे राज्यातील पशुधन घटले आहे. मनुष्यबळाअभावी उपचार न झाल्यास भविष्यात अशा घटना टाळण्यासाठी तसेच खासगी क्षेत्रातील पशुवैद्यकीय पदवीधरांची वाढती मागणी लक्षात घेता खाजगी महाविद्यालये सुरू करण्यासाठी अधिनियमामध्ये सुधारणा करण्यात आल्याची माहिती विखे पाटील यांनी दिली.