Baramati News : महावितरण कंपनीकडून ग्राहकसेवा गतिमान करण्यावर विशेष भर दिला आहे. बारामती परिमंडळात मागील ५० दिवसांत पैसे भरल्यापासून अवघ्या २४ तासांत ६१०, तर ४८ तासांत ६९३ वीजजोडण्या देण्याचे काम वीज कर्मचाऱ्यांनी केले आहे. हे काम महावितरणचे व्यवस्थापकीय संचालक लोकेश चंद्र यांच्या मार्गदर्शनाखाली करण्यात आले आहे.

विजेच्या विविध सेवांसाठी महाराष्ट्र राज्य विद्युत नियामक आयोगाने कृती मानके ठरवून दिली असून, प्रत्येक सेवेसाठी कालमर्यादा निश्‍चित केली आहे. ग्राहकांना वेळेत व नियमितपणे वीजजोडण्या दिल्या, तर वीजचोरी कमी होऊन कंपनीच्या महसुलात भर पडेल.

तसेच ग्राहक व कंपनीतील संबंध अधिक दृढ होतील यासाठी महावितरणचे व्यवस्थापकीय संचालक लोकेश चंद्र यांनी २४ ते ४८ तासांत जोडण्या देण्याचे निर्देश सर्व क्षेत्रीय अभियंत्यांना दिले आहेत. या कामी संचालन विभागाचे संचालक संजय ताकसांडे व प्रादेशिक संचालक अंकुश नाळे यांनी युद्धपातळीवर अंमलबजावणी केली आहे.

बारामती परिमंडळात मुख्य अभियंता सुनील पावडे यांच्या मार्गदर्शनाखाली १ जुलै ते ९ ऑगस्ट या ५० दिवसांत १३०३ वीजजोडण्या देण्यात आल्या आहेत. त्यातील ६१० वीजजोडण्या २४ तासांत, तर ६९३ जोडण्या ४८ तासांत दिले आहेत.

दररोज या कामांचा वेग वाढतच चालला आहे. चालू महिन्यात आतापर्यंत १९७ जोडण्या देण्याचे काम झाले आहे. त्यामुळे प्रतीक्षा यादी शून्याकडे जात आहे. वीज ग्राहकांनीही या जलद सुविधांचा लाभ घेण्यासाठी महावितरणच्या www.mahadiscom.in या संकेतस्थळाचा व मोबाइल ॲपचा वापर करून विविध वीज सेवांचा ऑनलाइन लाभ घ्यावा, असे आवाहन करण्यात येत आहे.