गडचिरोली : वडिलोपार्जित बंदुका (Guns) व शस्त्रे देण्याचे आवाहन पोलिस अधीक्षक नीलोत्पल यांनी केले होते. या आवाहनाला सकारात्मक प्रतिसाद देत जिल्ह्याच्या दुर्गम, अतिदुर्गम भागातील नागरिकांनी त्यांच्याकडे बाळगलेल्या ६८ भरमार बंदुका (Bharmar Gun) व १२ बॅरल पोलिस दलाच्या स्वाधीन केल्या.

डिसेंबर-२०२२ मध्ये उपविभाग जिमलगट्टा अंतर्गत उपपोलिस स्टेशन दामरंचा २० भरमार, उपपोलिस स्टेशन रेपनपल्ली ५ भरमार, पोस्टे जिमलगट्टा २, उपविभाग अहेरीअंतर्गत उपपोस्टे पेरमिली १५ भरमार व ३ बॅरल, पोस्टे मुलचेरा २ भरमार, उपपोस्टे राजाराम (खां.) १२ भरमार व ९ बॅरल, उपविभाग पेंढरी कॅम्प कारवाफा अंतर्गत ८ भरमार, पोलिस मदत केंद्र गोडलवाही ४ भरमार बंदुका पोलिसांच्या स्वाधीन करण्यात आल्या आहेत.

भरमार बंदुका जमा केल्यामुळे नक्षलवादी जे सामान्य नागरिकांचा चळवळीसाठी वापर करत होते व सोबत भरमार बंदुका बाळगल्यामुळे नागरिकांच्या जीवितास धोका होता, त्यास आळा बसला आहे.

पोलिस अधीक्षक नीलोत्पल यांनी या कामगिरीकरिता परिश्रम घेणाऱ्या अधिकारी व अंमलदारांचे कौतुक केले असून, जिल्ह्यातील आणखी काही नागरिकांकडे भरमार बंदुका असल्यास त्यांनी आपले जवळचे पोलिस स्टेशन, उपपोलिस स्टेशन, पोलिस मदत केंद्र येथे स्वाधीन करावे, आवाहन जिल्ह्यातील नागरिकांना केले आहे.