सध्याच्या काळात गव्हाच्या चांगल्या वाढीसाठी काटेकोर पाणी व्यवस्थापन आणि आंतरमशागतीवर भर द्यावा. गव्हाची भारी जमिनीत लागवड केलेली असल्यास १८ दिवसांच्या अंतराने पाण्याच्या पाळ्या द्याव्या लागतात. मध्यम जमिनीसाठी १५ दिवसांच्या अंतराने सात पाळ्या द्याव्यात तर हलक्या जमिनीस १० ते १२ दिवसाच्या अंतराने ८ ते १० पाळ्या द्याव्यात. पीक वाढीच्या महत्त्वाच्या अवस्थेत पाण्याचा ताण पडल्यास उत्पादनावर परिणाम होतो.
गहू पिकाला वेळेवर पाणी न दिल्यास पिकावर होणारे परिणाम बघुया. गहू पेरणीनंतर २१-२५ दिवसांनी म्हणजेच मुकुटमुळे फुटण्याच्या वेळी पाण्याचा ताण पडल्यास मुकुटमुळे कमी फुटतात. फुटलेल्या मुळ्या जास्त पसरत नाहीत. फुटवे कमी येतात. गहू काढणीस लवकर येतो. उत्पादनात घट येते. गहू पेरणीनंतर ५५ ते ६० दिवसांनी म्हणजेच फुटवे फुटण्याच्या अवस्थेत पाण्याचा ताण पडल्यास ओंब्या कमी बाहेर पडतात. बाहेर पडलेल्या ओब्यांची लांबी कमी होते. उत्पादनात घट येते.
पेरणीनंतर ७० ते ८० दिवसात गहू पीक फुलोऱ्यात येते. या काळात पाण्याचा ताण पडल्यास परागसिंचन कमी होऊन दाण्याची संख्या घटते.
गहू पेरणीनंतर ९०-१०० दिवसांनी दाण्यात चिक भरतो. या अवस्थेत दाणे पोसतात, त्यांचा आकार वाढतो. या काळात जमिनीत ओलावा कमी असल्यास दाण्याचा आकार लहान होतो, वजन कमी होते. पेरणी नंतर ११० दिवसांनी दाणे टणक होतात. या अवस्थेत जमिनीत ओलावा कमी असल्यास दाण्याचा आकार कमी होतो. दाण्यांवर सुरकुत्या पडून प्रत निकृष्ट होते.
आंतरमशागतीचे नियोजन कसं कराल?
पेरणी नंतर २१ ते ३० दिवसांनी एक खुरपणी आणि कोळपणी करून तण नियंत्रण करावे. गव्हात चांदवेल, हरळी यासारख्या तणांचा प्रादुर्भाव होतो. त्याकरिता जरूरीप्रमाणे एक किंवा दोन खुरपणी, तसेच कोळपणी करून जमीन मोकळी करावी. आंतरमशागतीमुळे तणांचे नियंत्रण होते. जमिनीत ओलावा टिकून रहातो. खुरपणीनंतर शिफारशीत मात्रेपैकी उर्वरित नत्राची मात्रा द्यावी. बागायती वेळेवर पेरलेल्या गव्हास खुरपणी झाल्यानंतर म्हणजेच सर्वसाधारणपणे २१-३० दिवसांनी प्रती हेक्टरी ६० किलो नत्र म्हणजेच १३० किलो युरिया), बागायती उशिरा पेरलेल्या गव्हाला प्रती हेक्टरी ४० किलो नत्र म्हणजेच ८७ किलो युरिया द्यावा. पीक ५५ ते ७० दिवसांचे असताना १९:१९:१९ या विद्राव्य खताची दोन टक्के म्हणजेच १० लिटर पाण्यात २०० ग्रॅम १९:१९:१९ मिसळून दोन वेळा फवारणी करावी. याप्रमाणेच दाणे भरण्याच्या अवस्थेतही दोन टक्के युरियाची फवारणी करावी.
ॲग्रोवनचे सदस्य व्हा
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.