ॲस्टर लागवडीचे नियोजन करताना हंगाम, जातींची निवड, क्षेत्र, पाण्याची उपलब्धता या बाबींचा प्रामुख्याने विचार करावा.
लागवड करताना सगळे क्षेत्र एकाच वेळी न लावता तीन अगर चार टप्प्यांत लावावे, म्हणजे फुले अधिक काळ बाजारात पाठविता येतील. मध्यम, उत्तम पाण्याचा निचरा होणारी आणि सेंद्रिय खतयुक्त जमीन या फुलपिकास आवश्‍यक असते. वरकस, हलक्‍या जमिनी, तसेच चुनखडीयुक्त जमिनीत याची लागवड करू नये. जमिनीची मशागत करून हेक्‍टरी १२ टन शेणखत मिसळून घ्यावे. लागवडीपूर्वी हेक्‍टरी ५० किलो नत्र, १०० किलो स्फुरद आणि १०० किलो पालाश जमिनीत चांगले मिसळून घ्यावे. रासायनिक खतांची मात्रा माती परीक्षणानुसार द्यावी. यानंतर ६० सें.मी. अंतरावर सरी- वरंबे तयार करावेत. लागवड ६० x ३० सें.मी. किंवा ४५ x ३० सें.मी., ४५ x ४५ सें.मी. अंतरावर करतात. लागवड करताना वरंब्याच्या मध्यभागी लागवड करावी. फुले गणेश व्हाइट ः ही जात लांब दांड्याची फुले मिळण्यासाठी उपयुक्त असून, फुले शुभ्र पांढऱ्या रंगाची असतात. हंगाम चार ते पाच महिन्यांचा असतो. फुलांचे चांगले उत्पादन मिळते. फुलदाणीमध्ये जास्त काळ फुले टिकतात. फुले गणेश पिंक ः फुलावर लवकर येणारी जात असून, निमपसरी, आकर्षक गुलाबी रंगाची फुले मिळतात. हंगाम चार ते पाच महिने असतो. फुले गणेश व्हायलेट ः ही जात निमपसरी, फुलावर लवकर येणारी आणि गडद जांभळ्या रंगाची फुले मिळतात. हंगाम चार ते पाच महिने असतो. गणेश पर्पल ः फुले फिक्कट जांभळ्या रंगाची असतात. फुलांचे चांगले उत्पादन मिळते. - ०२० - २५६९३७५० राष्ट्रीय कृषी संशोधन प्रकल्प, गणेश खिंड, पुणे
