Tur Harvesting : तूर कापणी प्रयोगाला ‘झेडपी सीईओं’ची हजेरी

Akola News : जिल्ह्यात पंतप्रधान पीक विमा योजनेअंतर्गत तूर पिकाचा समावेश असून सध्या तुरीच्या मळणीचा हंगाम सुरू झालेला आहे.

या काळात अकोला तालुक्यात पंचायत समिती स्तरावर आठ पीक कापणी प्रयोगांचे नियोजन करण्यात आले असून याअंतर्गत जिल्हा परिषद मुख्य कार्यकारी अधिकारी बी. वैष्णवी यांनी उगवा येथे भेट देत तूर पिकाची पाहणी केली.

यावेळी जिल्हा परिषद कृषी विकास अधिकारी डॉ.तुषार जाधव, गटविकास अधिकारी राजेश खुमकर, कृषी अधिकारी रोहिणी मोघाड, विस्तार अधिकारी गजानन गावंडे, मनोज बोपटे, सरपंच गजानन बहाकार, ग्रामपंचायत अधिकारी प्रशांत क्षीरसागर, विमा प्रतिनिधी शुभम हरणे उपस्थित होते.

विमा नुकसान भरपाई ही पीकविमा प्रयोगाच्या उत्पादकतेवरून निश्‍चित होत असते. हे लक्षात घेत मुख्य कार्यकारी अधिकारी बी. वैष्णवी यांनी पर्यवेक्षीय अधिकारी म्हणून उगवा येथे रितेश पटेल यांच्या तुरीच्या शेतात उपस्थिती लावली.

शेताची निवड, निवड केलेल्या शेतात रँडम पद्धतीने प्लॉटची आखणी करणे, निवडलेल्या क्षेत्रातून प्रत्यक्ष कापणीची पाहणी व उपस्थित शेतकऱ्यांना पीक कापणी प्रयोगाचे महत्त्व पटवून दिले.