Agricultural implements : शेती अवजारे बँकांनी केले महिलांचे कष्ट कमी

सूर्यकांत नेटके

Nagar News : जिल्ह्यात महिला आर्थिक विकास महामंडळाने महिला बचत गटांना शेती अवजारे बॅंका दिल्या. त्यातून ग्रामीण भागातील शेतकरी, कष्टकरी महिलांच्या जीवनात बदल होत आहे. अवजारे बॅंकांमुळे शेतकरी कुटुंबातील एक हजारापेक्षा अधिक महिलांचे कष्ट कमी झाले. वेळेची बचत झाली. रोजगार उपलब्ध झाला आहे. हा उपक्रम नगर जिल्ह्यात तीन वर्षांपासून राबवला जात आहे. जिल्हा नियोजन समितीच्या निधीतून महिला बचत गटासाठी शेती अवजारे बॅंक देण्याचा उपक्रम राबविणारा नगर हा राज्यातील पहिलाच जिल्हा आहे. एक हजारापेक्षा अधिक महिला या अवजारांचा लाभ घेत आहे.

जिल्हा नियोजनामधून शेती अवजार बॅंका

महिला बचत गटातील बहुतांश महिला शेतकरी असल्याने तीन वर्षांपासून राज्यात पहिल्‍यांदात नगर जिल्ह्यात महिला बचत गटाला अनुदानावर शेती अवजारे बॅंका देण्याचा उपक्रम राबवला जात आहे. महिला आर्थिक विकास महामंडळाने त्यांच्याकडील महिला बचत गटांना समाजकल्याण विभागाच्या मदतीने आतापर्यंत तीन वर्षांत नगर तालुक्यातील १२, पाथर्डी, श्रींगोंदा, कर्जत, कोपरगाव, नेवासा तालुक्यात प्रत्येकी १३, तर राहुरी, राहाता तालुक्यांत प्रत्येकी १४ शेती अवजारे बॅंका दिल्या.

९५ टक्के शासनाकडून अनुदान यासाठी मिळाले असून, ५ टक्के वाटा महिला बचत गटांनी भरला आहे. १०६ गटांतील सुमारे १ हजार ६० महिला या अवजारे बॅँकांचा सध्या लाभ घेत आहेत. महिला बचतगटांना दिलेल्या शेती अवजारे बॅंकेत समारे १८३ प्रकारची अवजारे आहेत.

अवजारे बॅंकेतील शेती साहित्य

पिठाची गिरणी, मनुष्यचलित तसेच बॅटरीचलित तसेच सायकलचलीत फवारणी पंप, रोप लागवड यंत्र, ड्रमस्टिक हार्वेस्टर, मनुष्यचलित, बैलचलित कोळपे, बारा दाती पेरणीयंत्र, बैलचलित पेरणीयंत्र, दोन एचपी कडबाकुट्टी, बलराम बहुउद्देशीय शेती यंत्र, एकवीस फूट लांबीची शिडी, पाच एचपी विद्युतपंप, आकडी विळा, फूड ग्रेड ग्राइंडर, पलव्हाइजरसह शंभर किलो वजनकाटा व सीलिंग मशिन, स्पायरल सेपरेटर, मॅन्युअल कॉटन प्लांट पुलर, गकट, खुरपे, विळे, नारळ सोलणी यंत्र, इमस्टिक हार्वेस्टर, दुधारी खुरपे, आंबा झेला, दात्री विळा, खडा विळा, दातेली, रोप लागवड पंजा, दुधी विळा, सुधारित विळे, कायते, फावडे, पहार, टिकाव, घमेले, रोप लागवड पंजा, संरक्षक किट, ताडपत्री

कष्ट झाले हलके

अवजारे बॅंकांमुळे महिलांचे कष्ट कमी झाले आणि वेळेची बचत झाल्याचा अनुभव येत आहे. नगर तालुक्यातील अकोळनेरमधील अनामिका महिला गटाच्या ज्योस्त्‍ना सुभाष घोरडपडे यांनी सांगितले, की आमचा महिला बचत गट पाच-सात वर्षांपासून कार्यरत आहे.

महिला बचत गटाला जिल्हा नियोजन समितीच्या निधीतून शेती अवजारे बॅंक देणारा नगर जिल्हा पहिलाच आहे. आमच्या गटातील महिला शेतकरी असल्याने तीन वर्षांपूर्वी शेती अवजारे बॅंक मिळाली. महिलांना एक वर्षाच्या करारावर अवजारे दिलेली आहेत. महत्त्‍वाची अवजारे गरजेनुसार महिला अन्य शेतकऱ्यांना भाड्याने देत आहेत.