Ajit Pawar: संभाजी महाराज स्मारकासाठी निधी कमी पडू देणार नाही: अजित पवार

Shirur News: ‘‘धर्मवीर छत्रपती संभाजी महाराजांचे अतुलनीय शौर्य, पराक्रम व प्रेरणादायी इतिहास नव्या पिढीला समजावा, यासाठी श्रीक्षेत्र तुळापूर, वढू बुद्रुक प्रमाणेच रत्नागिरीत संगमेश्वर येथेही राजांचे दर्जेदार स्मारक उभारण्याचा शासन प्रयत्नशील असून, ही तीनही स्मारके उभारताना शासन निधी कमी पडू देणार नाही,’’ अशी ग्वाही देऊन उपमुख्यमंत्री अजित पवार यांनी शनिवारी (ता.२९) तुळापूर येथे सुरू असलेल्या स्मारकाच्या कामाची पाहणी करीत स्मारकाचे काम दर्जेदार पद्धतीने करण्याच्या सूचनाही संबंधित अधिकाराऱ्यांना दिल्या.

स्वराज्य रक्षक धर्मवीर छत्रपती श्री संभाजी महाराज यांच्या ३३६ व्या पुण्यस्मरण दिनानिमित्त उपमुख्यमंत्री अजित पवार यांनी श्रीक्षेत्र तुळापूर येथे बलिदानस्थळी राजांना अभिवादन करून पुतळ्याला पुष्पहार अर्पण केला.

या वेळी त्यांच्यासमवेत आमदार माऊली कटके, जिल्हा परिषदेचे मुख्य कार्यकारी अधिकारी गजानन पाटील, सार्वजनिक बांधकाम विभागाचे मुख्य अभियंता अतुल चव्हाण, कार्यकारी अभियंता अमोल पवार यांच्यासह अनेक अधिकारी व मान्यवरही उपस्थित होते.

या वेळी उपमुख्यमंत्री पवार यांनी तुळापूर येथे सुरू असलेल्या स्मारकाच्या कामाची पाहणी करीत अधिकाऱ्यांकडून आढावा घेतला. तसेच स्मारकाच्या दुसऱ्या टप्प्यातील पुलासह उर्वरित कामासाठी आवश्यक भूसंपादनाची कार्यवाही तसेच नदीकाठच्या जुन्या घाटाला जोडून नव्या घाटाच्या कामासह स्मारकाच्या विविध ऐतिहासिक पद्धतीच्या इमारतींचे बांधकाम दर्जेदार करण्याच्या सूचना उपमुख्यमंत्री पवार यांनी दिल्या.

‘‘स्मारक उभारताना सर्वांना अभिमान वाटेल असे स्मारक वढू-तुळापुरात उभारण्याचा शासनाचा प्रयत्न असून पालकमंत्री म्हणून माझे बारकाईने लक्ष आहे. ऐतिहासिक प्रेरणादायी स्मारके उभारताना ऐतिहासिक संदर्भ, स्थानिक ग्रामस्थ, ग्रामपंचायती व संबंधित प्रमुख घटकांना विचारात घेऊनच स्मारक उभारणी करण्यात येत असून याबाबत नागरिकांच्या काही नवसंकल्पना, सूचनांचाही विचार स्मारक उभारणीत केला जाईल,’’ अशी ग्वाही त्यांनी दिली.