Vidarbha Rain News : पश्चिम विदर्भाला दमदार पावसाची प्रतीक्षाच

Akola Rain Update : राज्याच्या विविध भागांत मॉन्सून सक्रिय झाला. पश्चिम विदर्भातील अकोला, बुलडाणा, वाशीम जिल्ह्यांत अनेक भागात मात्र, अद्यापही पाऊस झालेला नसल्याने पेरण्या रखडलेल्याच आहेत. वातावरणातील उष्णता कमी झाली आहे. दिवसभर ढगाळ वातावरण राहत आहे.

मागील दोन दिवसांत राज्यात विविध भागांत पावसाने दमदार हजेरी दिली. या भागात सार्वत्रिक स्वरूपाचा पाऊस मात्र झालेला नाही. जूनचा शेवटचा आठवडा उघडला तरी अद्याप पावसाचे आगमन झालेले नाही.

यंदाच्या हंगामात अकोला जिल्ह्यात आतापर्यंत जेमतेम पेरणी झाली आहे. पाऊस नसल्याने कोरडवाहू पट्ट्यात पेरणीला सुरुवातही होऊ शकलेली नाही. प्रामुख्याने प्री-मॉन्सून कपाशीची लागवड तेल्हारा, अकोट, बार्शीटाकळी आदी तालुक्यांत झालेली आहे. कृषी विभागाच्या नोंदीनुसार हे क्षेत्र ५५० हेक्टरपर्यंत आहे.

बुलडाणा जिल्ह्यात कपाशीची लागवड सुमारे १४५०० हेक्टरपेक्षा अधिक क्षेत्रावर झालेली आहे. सिंचनाची सोय असलेल्या शेतकऱ्यांनी ही लागवड केली.

यात प्रामुख्याने मोताळा तालुक्यात ४६७४ हेक्टर, खामगाव ३२४०, मलकापूर २५४०, नांदुरा १४३८, संग्रामपूर २७५, बुलडाणा २७२, देऊळगावराजा १०९, जळगाव जामोद १११८, सिंदखेडराजा ३७५ हेक्टरवर पेरणी आटोपली आहे. उर्वरित इतर पिकांची मात्र पाऊस नसल्याने पेरणी रखडलेली आहे.

वाशीम जिल्ह्यात खरिपाचे चार लाख हेक्टर क्षेत्र आहे. यात ७५ टक्के क्षेत्र म्हणजेच सर्वाधिक तीन लाख हेक्टरवर सोयाबीनची पेरणी केली जाते. याही जिल्ह्यात सार्वत्रिक स्वरुपाचा पेरणीलायक पाऊस झालेला नाही.

प्री-मॉन्सून कपाशीची जगवण्याची धडपड

अकोला जिल्ह्यात सातपुड्याच्या पायथ्याशी तेल्हारा, अकोट तालुक्यांत शेतकऱ्यांनी जूनच्या पहिल्या आठवड्यात कपाशीची लागवड केली. मात्र, उन्हाच्या तीव्रतेमुळे कपाशीची रोपे जागेवर करपली.

वाणी किडीचा प्रादुर्भावही वाढला होता. हे पीक जगवण्यासाठी शेतकऱ्यांनी दिवस-रात्र मेहनत घेतली. रात्रभर जागून पिकाला पाणी दिले. आता कपाशीच्या पिकाला पावसाची मोठी प्रतीक्षा आहे.