Nashik News : ग्रामीण भागात घरफोड्यांबरोबरच आता फळपिकांच्या चोऱ्यांचे प्रमाणही वाढले असून कसमादे भागात डाळिंब उत्पादकांनी थेट डाळिंब बागेतच पहारा वाढवला आहे. रात्रीच्या वेळेस बागेत मुक्कामाला थांबत जागते रहो, हा नारा डाळिंब उत्पादक देत आहेत.
विठेवाडी (ता. देवळा) येथील बोरसे या शेतकऱ्याने बागेतून डाळिंब फळे चोरीला जाऊ नयेत, म्हणून रात्रीच्या वेळेस डाळिंब राखण सुरू केली आहे.
ग्रामीण भागात आता फळ पिकांच्या चोऱ्यांचे प्रमाणही वाढले असून सध्या डाळिंबाला चांगला बाजारभाव असल्याने अनेक शेतकऱ्यांच्या बागांतून डाळिंब फळे चोरीच्या घटना वाढत आहेत.
त्यामुळे डाळिंब उत्पादक शेतकऱ्यांमध्ये घबराट आहे. फळपिके चोरणाऱ्या टोळीचा बंदोबस्त बागांमध्ये रात्रीच्या वेळेस पाळत ठेवूनच होऊ शकतो. म्हणून डाळिंब उत्पादक रात्रीच्या वेळेस बागांमध्ये राखणीला थांबू लागले आहेत.
डाळिंब चोरीच्या घटना वाढू लागल्या आहेत. रात्री शेतकरी शेतात नसतात, त्यामुळे चोरटे रात्री बागांतून डाळिंब तोडून ते पोत्यांमधून भरून ते लंपास करतात. ही चोरी सहज करता येते व पैसादेखील चांगला मिळतो म्हणून डाळिंब बागा असलेल्या भागांत मोठ्या प्रमाणावर चोऱ्या वाढू लागल्या आहेत.
या वर्षी डाळिंबाला चांगला बाजार असल्याने विक्रीसाठी तयार असलेल्या डाळिंबाची चोरी होऊ नये म्हणून अनेक शेतकरी रात्री जागरण करत डाळिंब बागेत पहारा देत आहेत. डाळिंब उत्पादक शेतकऱ्यांनी मोठ्या कष्टाने डाळिंबाच्या बागा तयार केल्या आहेत.
यासाठी डाळिंब बागेत मचाण, माळा तयार करून तसेच एक-दोन जण सोबतीला ठेवून डाळिंब उत्पादक रात्रीच्या वेळेस जागता पहारा देऊ लागले आहेत. प्रशासनाने याकडे लक्ष देऊन रात्रीची गस्त वाढवून चोरांवर कारवाई करावी, अशी मागणी शेतकऱ्यांमधून केली जात आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.