Aashadhi Wari 2025 : पालखी मार्ग, वाहतूक व्यवस्थापनाकडे लक्ष द्या

Solapur News : पालखी मार्ग खड्डेमुक्त राहतील व उत्तम वाहतूक व्यवस्थापन राहील, याची काळजी घ्या. पालखी मार्गावर पुरेसा पोलिस बंदोबस्त ठेवा. घाट परिसरात दरड कोसळून होणाऱ्या दुर्घटना टाळण्यासाठी प्रतिबंधात्मक उपाययोजना करा. पुणे, सातारा व सोलापूर या तिन्ही जिल्ह्यांतील पालखी मार्गावरील व्यवस्थेबाबत एकत्र पुस्तिका तयार करण्याची सूचना विभागीय आयुक्त डॉ. चंद्रकांत पुलकुंडवार यांनी दिली.

विभागीय आयुक्त कार्यालयात झालेल्या आषाढीवारी पूर्वतयारी आढावा बैठकीत ते बोलत होते. यावेळी सोलापूर जिल्हाधिकारी कुमार आशीर्वाद दूरदृश्य प्रणालीद्वारे सहभागी झाले होते. डॉ. पुलकुंडवार म्हणाले, पालखी सोहळ्यात वारकऱ्यांना आवश्यक सुविधा उपलब्ध करून देण्यासह मागील पालखी सोहळ्याप्रमाणे सुरक्षित, अपघातमुक्त, स्वच्छ आणि हरित वारी संपन्न करण्यासाठी विभागातील सर्व अधिकाऱ्यांनी सूक्ष्म नियोजन करावे.

मानाच्या पालख्यांच्या विश्वस्तांसोबत बैठक घेऊन त्यांच्या सूचनेनुसार कार्यवाही करावी. वारी कालावधीत अन्न शुद्धतेची खात्री करण्यासाठी आवश्यकतेनुसार अन्न व औषध प्रशासनाकडील अधिकारी-कर्मचाऱ्यांची संख्या वाढवावी आणि येत्या काळात अन्न भेसळ करणाऱ्याविरोधात व्यापक मोहीम राबवावी.

पालखी मार्गावर मोठ्या प्रमाणावर वृक्ष लागवड करावी. पालखी सोहळ्यादरम्यान आणि नंतरही स्वच्छता राहावी, यासाठी आवश्यकतेनुसार स्वच्छतागृहांची संख्या वाढवावी. चंद्रभागेचे पाणी स्वच्छ राहील, यासाठी आवश्यक उपाय योजावेत आदी सूचनाही डॉ. पुलकुंडवार यांनी केल्या.

गर्दी नियंत्रणासाठी एआयचा वापर...

पालखी सोहळ्याच्या पूर्वतयारीची माहिती दिली. सोहळ्यासाठी घटना प्रतिसाद प्रणाली स्थापण्यात आली आहे २५ हजार ५०० अधिकारी-कर्मचाऱ्यांची नियुक्ती करण्यात येणार आहे. सोहळ्यादरम्यान १ हजार ८६० स्वयंसेवकांची मदत घेतली जाणार आहे.

पालखी मार्गावर पाणी, विद्युत, आरोग्य, गॅस सिलिंडर, स्वच्छता आदी सुविधांचे नियोजन करण्यात येत आहे. महिलांसाठी विशेष सुविधा करण्यात येत आहेत. वारीच्या अनुषंगाने आपत्ती व्यवस्थापन आराखडा तयार करण्यात आला आहे. गर्दी व्यवस्थापनासाठी कृत्रिम बुद्धिमत्तेचा वापर करण्याबाबत चाचणी घेण्यात येत असल्याचे जिल्हाधिकारी कुमार आशीर्वाद यांनी सांगितले.